Սամվել Թոփալյան. Ոչ մի միջադեպ տեղի չունեցավ

Սամվել Թոփալյանը մարտի 3-ին պաշտոնապես լքեց ամուրիների շարքը: “Գոյ” եւ Հենրիկ Մալյանի անվան թատրոնների դերասանի ու արդեն կնոջ՝ Սոնա Դավթյանի պսակադրության մասին BRAVO.am-ը պատմել է օրեր առաջ՝ խոստանալով նոր լուսանկարներ ներկայացնել:

“Այն համեմված էր հայկական ու ժամանակակից էլեմենտներով՝ զուռնա-դհոլից մինչեւ դիջեյ”,-մեզ հետ զրույցում ասել էր Սամվել Թոփալյանն, իսկ այսօր նա հավելել է հետեւյալը.“Ինձ համար ամենակարեւորն այն է, որ հարսանիքս անցավ ջերմ մթնոլորտում: Այդ օրն իմ կողքին էին ինձ հարազատ ու մտերիմ մարդիկ, ովքեր իսկապես ուրախացան: Եվ ոչ մի միջադեպ տեղի չունեցավ, որը կարող էր խաթարել մեր տոնը”:

Նվերներն ու հարսանիքի հետ կապված այլ մանրամասներ համարելով խիստ անձնական՝ դրանց մասին նորապսակները չեն ցանկանում բարձրաձայնել, միայն նշել են, որ Ծաղկաձորում ունեցած հանգստից հետո վերադարձել են աշխատանքային առօրյային, ապրում են Սամվել Թոփալյանի ծնողների հետ. “Մեր ընտանիքում համերաշխություն է տիրում”:

Խոսելով մասնագիտական գործունեության մասին՝ դերասանը նշել է, որ երկու թատրոնի ներկայացումներում զբաղված լինելուց բացի, այժմ խաղում է նաեւ “Թատրոն 32”-ում. Սամվել Թոփալյանի եւ այլ մի քանի դերասանի մասնակցությամբ՝ Պարույր Սեւակի պոեզիայի հիման վրա ստեղծված թատերական կոմպոզիցիայի պրեմիերային BRAVO.am-ի անդրադարձը կարող եք կարդալ այստեղ:

“Հանդիսատեսը շատ լավ ընդունեց, կարծում եմ, որ հավանել են”,-ասել է Սամվել Թոփալյանը՝ նշելով, որ սիրով է ընդունել ներկայացման բեմադրող ռեժիսոր Կարեն Բաբաջանյանի՝ “Թատրոն 32”-ում հանդես գալու հրավերը. “Համոզված էի, որ հետաքրքիր բան է ստացվելու: Կարենին ճանաչում եմ դեռ ուսանողական տարիներից. երկուսս էլ թատերական նույն դպրոցն ենք ավարտել՝ Արմեն Մազմանյանի կուրսը”:

Բազմազբաղ դերասանը, որը ժամանակին հանդես էր գալիս նաեւ հեռուստասերիալում եւ վարում էր Հ1-ի առավոտյան ծրագիրը, նշել է՝ հետաքրքիր առաջարկների դեպքում հնարավոր է՝ կրկին վերադառնա եթեր:

{gallery}1099{/gallery}