Կյանքը սիրելու 10 պատճառ

Նա միշտ ամեն ինչից դժգոհ է, մշտապես տրտնջում է կյանքից, ճակատագրից, մայրիկից, հայրիկից և ուսուցիչներից, նվնվան է, նրա վրա չի կարելի հույս դնել: Նա միշտ ամեն ինչ և ամեն բան մոռանում է, խղճուկ անհաջողակ է: Ի՞նչ իմաստ ունի նրա հետ շփվելը: Ընկերուհիների մոտ գլուխ գովելու համա՞ր: Այդ դեպքում դա պետք է լինի Կարմիր գրքի անհետացող տղաների յուրահատուկ, հազվադեպ նմուշ: Այսպես, առանց նրա ավելի լա՞վ է: Կյանքն առանց երիտասարդի, առաջին հայացքից հեքիաթ է թվում: Իսկ եթե ուշադիր զննե՞նք:

Նա չի կանգնի քո և աշխատանքիդ կամ ուսմանդ միջև: Եթե դուրդ չի գալիս այն, ինչով զբաղվում ես, համարձակորեն փոխիր ջանքերդ ներդնելու ոլորտը: Ոչ մեկը քեզ չի հանդիմանի, չի առաջարկի «սեղմել ատամներդ ու կրծել թունելը նույն ուղղությամբ»: Ցանկանում ես ծովային ռազմական գծանավի հրամանատար լինել՝ ծովագնաց դարձիր, ուզում ես բանաստեղծուհի դառնալ՝ գրիր: Մի սպասիր, մինչև հայտնվի նա՝ այն անհամեմատելին և հաստատի որոշումդ: Իհարկե, դա քեզ վստահություն կներշնչի... Ուրեմն՝ ինքնավստահ եղիր:

Վերջապես բնակարանդ կահավորիր այնպես, ինչպես միշտ ցանկացել ես, ինչպես հարմար և հաճելի է քեզ, այլ ոչ թե նրան: Հիշի՛ր, դա քո ապաստարանն է, որտեղ տեղ չունեն անցանկալի իրերը (և սուբյեկտները) շրջապատող իրականությունից և եթե քեզ դուր է գալիս որևէ փոքր իր, եթե այն քեզ ուրախացնում է, առանց մտածելու գնիր այն: Ի՜նչ հիանալի է, երբ դրա համար թույլտվություն չի պահանջվում:

Ընկերության հիմքում հարաբերությունների որակն է, ոչ թե դրանց քանակը, իսկ ընկերներն այն մարդիկ են, ովքեր մեր կյանքը լցնում են բազմազանությամբ և հաճույքներով: Ավաղ, ընկերությունը դժվար պահերին է քննություն բռնում. հուզումների, անձնական կորուստների և հանկարծահաս աղետի ժամանակ: Մնացել ես առանց ընկերոջ, որն անշուշտ կորուստ է, ահա և ստուգիր ընկերուհիներիդ քո հանդեպ ունեցած հարբերությունների որակը: Վստահ եղիր՝ քեզ քիչ անակնկալներ չեն սպասվում, թեև հաճախ ոչ հաճելի… Իսկական ընկերները հասկանում են՝ քեզ երբ է պետք փոխվել անճանաչելիության աստիճանի և երբ մնալ այնպիսին, ինչպիսին կաս:

Մի՛ հրաժարվիր տղաների հետ հանդիպումներից, բայց թող ամեն հանդիպումը քեզ համար արկած լինի, բնականաբար, դրական իմաստով: Հաջող հանդիպման գաղտնիքը տղայից ոչինչ չսպասելն է: Նրան մի ընդունիր որպես հնարավոր ընկեր, ամուսին, այլ մտածիր, որ նրան այլևս չես տեսնելու: Պատկերացրու, որ լրտես ես և պետք է նրանից որքան հնարավոր է շատ տեղեկություն ստանաս: Չի բացառվում, որ բացահայտես որևէ չափազանց հետաքրքիր փաստ, հանկարծ տղան անձնական գործակալդ լինի:

Կառավարիր փողերը մսխելու սովորությունդ: Միայնակ աղջիկը ստիպված է վերահսկել իր ծախսերը: Տխրությունը գնումներով քողարկելու սովորությունից ազատվելը նույնքան դժվար է, որքան Անդրեին ընթրիքի հրավիրելը: Մի խոսքով՝ ամեն բան ֆինանսական խիստ ինքնավերահսկողություն է պահանջում, եթե այդ արվեստում հաջողության հասնես, թոշակի անցնելու ճիշտ ժամանակն է՝ տղաները այլևս քեզ պետք չեն գա:

Աշխատիր քեզ վրա: Մենք ապրում ենք տեղեկատվական առատության և բազում գիտելիքների ժամանակաշրջան. ուղեղիդ ծալքերում ներգրավիր թեկուզ դրանց մի մասը: Հարկային համակարգի վերաբերյալ տարրական գիտելիքները, ցուցահանդեսների և վերնիսաժների մասին տեղեկությունները, թեկուզ նվազագույն չափով տեղյակ լինելը ժամանակակից գրականության և արվեստի միտումներին, միանգամայն օգտակար են միայնակ ժամանակակից աղջկա համար. դրանք կօգնեն առավելագույն օգտակարությամբ և նվազագույն կորուստներով կազմակերպել կարիերան և ազատ ժամանակը: Թերթեր կարդա, հեռուստատեսությամբ հետևիր նորություններին, թանգարաններ և ցուցահանդեսներ այցելիր, մարզիր ուղեղդ, պետք կգա:

Վերջապես զբաղվիր մարմնովդ, որքա՞ն կարելի է հետաձգել: Կոնքերի չափսերը և ենթամաշկային ճարպի շերտը ենթարկիր շտկման, և երբ մի օր նայես հայելու մեջ, մարմնիդ ակնահաճո կլինի ոչ թե կողքից ինչ-որ մեկին, այլ հենց քեզ: Ի դեպ, ֆիզիկական վարժությունների անցնելը կնշանակի, որ ապաքինվել ես տղայի կյանքիցդ անհետացումից և առողջանում ես հոգեբանորեն: Մի խոսքով, մի նստիր և շարժվիր, և շուտով գրավիչ կազմվածք կունենաս:

Անհնարինության աստիճանի սիրիր քեզ: Աղջիկներն իրենց ընկերների և այլ զույգերի հետ հաճախ գնում են, ասենք, բնության գիրկ, խորոված անում, գարեջուր ու գազավորված որևէ բան խմում՝ ծանրաբեռնվելով «վատ խոլեստերինով» և գրեթե «ջնջված, վերադառնում տուն: «Ա՜յ, դա հանգիստ էր»,-ասում են նրանք հետո: Դու կարող ես չնմանվել նրանց՝ միայն պետք է Ծաղկաձորի կամ Դիլիջանի երեքօրյա ուղեգիր վերցնել և երևակայության ու առողջության համար օգտակար հանգիստ անցկացնել: Ի վերջո, կարելի է սիրած գիրքը ձեռքին կամ հաճելի երաժշտության ներքո լոգանք ընդունել:

Հաճույք ստացիր արտաքինիցդ: Առնչություն չունենալով բարդ հարաբերությունների հետ՝ օրը մի քանի անգամ կարող ես փոխել ոճդ՝ անտեսելով շրջապատի կարծիքը: Եթե թխահեր ես և քեզ հետաքրքում է, թե ինչ են զգում շիկահերները, դարձիր շիկահեր, հիմա դրա ճիշտ ժամանակն է: Եթե մազերդ երկար են կտրիր, եթե սև հագուստ ես հագնում, փոխիր սպիտակի կամ վարդագույնի: Եթե արդյունքները չգոհացնեն, մահացու չի լինի, իսկ գլխավորը, դա ընդմիշտ չէ. մազերդ նորից կաճեն, վարդագույն հագուստը կարող ես դեն նետել, և ոչ մեկը քեզ չի հիշեցնի, թե ինչ հիմար տեսք ունեիր ժամանակին: Իսկ եթե դուր գա... Կողոպտիր քաղաքը և գերիներ մի վերցրու:

Գնահատիր քեզ: Կարևոր չէ՝ սևահեր ես, թե՝ շիկահեր, բարձրահասակես, թե՝ կարճահասակ, դեռ քսան տարեկան չկաս կամ արդեն երեսունի մոտ ես, միևնույն է, բոլորն արժանի են, որ իրենց սիրեն: Բայց մինչ սիրո հայտնվելը, անհրաժեշտ է, որ ինքդ սիրես քեզ: Այդպիսի սերը շատ բարդ է, այն հորդում է միայն այն ժամանակ, երբ քեզ ընդունում ես այնպիսին, ինչպիսին կաս՝ գեղեցիկ կամ ոչ այնքան, հիմար կամ ավելի հիմար, խելացի, կռվարար, չար կամ դատարկամիտ: Երբ օբյեկտիվորեն կգնահատես քեզ, աշխարհը ոտքերիդ տակ կփռվի՝ վարվիր նրա հետ ինչպես ցանկանաս:

«Ես GIRL» ամսագիր, արխիվ