Կրակել են Բերդի քաղաքապետի որդու ուղղությամբ. վիրավորվել է նրա ընկերը

Ժամեր առաջ կրակոցներ են հնչել Երեւանի Ավան Առինջ թաղամասում: Հրազենային վնասվածքով հիվանդանոց է տեղափոխվել 40-ամյա Արմեն Սիմոնյանը: NEWS.am-ին միջադեպի հետ կապված հաջողվել է որոշ մանրամասներ ճշտել: Պարզվում է՝ վիրավորվող տղամարդու հետ է եղել նաեւ Բերդի քաղաքապետի որդին՝ Վանուշ Մանուչարյանը, ով նաեւ Բերդի էլեկտրացանցերի տնօրենն է:

Նշենք, որ նա նախկին պատգամավոր Գագիկ Մելիքյանի դստեր ամուսինն է: Ըստ տարածված տեղեկությունների՝ կրակոցն ուղղված է եղել Վանուշի դեմ, ով նույն թաղամասում բնակարան ունի: Նույն աղբյուրների փոխանցմամբ՝ այս օրերին վերջինիս հետապնդել են, նա էլ ահազանգել է մերձավորին, ում հետ ինչ-որ տեղ է գնացել եւ այդ ընթացքում էլ իրենց ուղղությամբ հնչել են կրակոցները:

Այս միջադեպի կապակցությամբ մանրամասներ փորձեցինք ստանալ ոստիկանությունից, սակայն այստեղից ոչինչ չհայտնեցի, միայն հաստատեցին կրակոցների հանգամանքը: