«ՀԺ». Հարցումների ուշագրավ արդյունքները

Եվրամիության ծրագրի շրջանակներում շաբաթ օրը հրապարակվել է «Եվրամիության հետ հարևանության բարոմետր» զեկույց, որը
կազմվել է բնակչության շրջանում իրականացված հարցումների հիման վրա: «Հայկական ժամանակը» գրում է, որ դրա արդյունքները
շատ ուշագրավ են:

Հարցումները իրականացվել են Եվրոպական հարևանության և գործընկերության երկրներում՝ Հայաստանում, Վրաստանում, Ադրբեջանում, Ռուսաստանում, Բելառուսում, Ուկրաինայում: Ըստ այդմ՝ ՀՀ-ում հարցվածների 90 տոկոսը Եվրամիությունը համարում է կարևոր գործընկեր և ցանկություն է հայտնել, որ այդ կառույցի հետ հարաբերություններն ավելի խորանան: Այս ցուցանիշով Հայաստանը վերը նշված երկրների շարքում առաջինն է: Պարզվել է նաև, որ հայաստանցիների 61 տոկոսը գտնում է, որ երկրում տեղի ունեցող գործընթացները ոչ ճիշտ ուղիով են
ընթանում: Սա այն դեպքում, երբ մյուս երկրներում այդպես է գտնում հարցվածների 41 տոկոսից ոչ ավելին: Հայաստանցիները ամենադժգոհն են նաև տնտեսական վիճակից՝ մոտ 60 տոկոսը դժգոհ է ներկա տնտեսական վիճակից և կարծում է, որ վատ օրերը դեռ առջևում են: Սակայն, որքան էլ տարօրինակ է, հայաստանցիների 67 տոկոսը նշել է, որ գոհ է իր ներկա կյանքից: Մյուս 6 երկրներում այս ցուցանիշը չի  գերազանցում 47 տոկոսը: