«Ժողովուրդ». Տարոն Մարգարյանը պաշտոններ է բաշխում

«Ժողովուրդ»-ի իրազեկ աղբյուրները փոխանցում են, որ Երեւանի քաղաքապետ Տարոն Մարգարյանը խոստացել է վերընտրվելուց հետո Երեւանի փոխքաղաքապետ նշանակել Մալաթիա-Սեբաստիա վարչական շրջանի ղեկավար Դավիթ Օհանյանին: Թերթի տեղեկություններով՝ Օհանյանին փոխարինելու է Երեւանի ավագանու անդամ Արթուր Պետրոսյանը՝ ԱԺ ՀՀԿ խմբակցության անդամ Սամվել Ալեքսանյանի քրոջ որդին:

«Ժողովուրդ»-ը զրուցել է Դավիթ Օհանյանի հետ՝ ճշտելու, արդյոք նա արդեն ստացե՞լ է այդպիսի առաջարկ: «Նման խոսակցություններ չեն եղել: Նման քննարկում չկա: Զարմանում եմ, թե որտեղից եք այդպիսի բան լսել»,- նշել է Օհանյանը՝ հայտարարելով, թե ինքն այժմ զբաղված է համայնքային խնդիրների կարգավորմամբ:

Թերթը հավելել է, որ Տ. Մարգարյանը «լավ պաշտոն» է խոստացել նաեւ ԱԺ ՀՀԿ խմբակցության անդամ Մհեր Սեդրակյանի որդուն, բայց միայն այն դեպքում, եթե պատգամավորը Երեւանի ավագանու ընտրությունների ժամանակ «լավ» ձայներ հավաքի: