Թատրոնը՝ որպես փոխըմբռնման և ազգերի միջև խաղաղության ամրապնդման միջոց

Մարտի 27-ին ամբողջ աշխարհում նշվում է Թատրոնի միջազգային օրը (World Theatre Day): Տոնը, ինչպես արդեն հայտնել ենք, սկսել են նշել 1961 թվականից, երբ ՅՈՒՆԵՍԿՕ-ի Միջազգային թատրոնի ինստիտուտը մարտի 27-ը հռչակեց թատրոնի միջազգային օր:

Առաջին տարին այս տոնը նշել են միայն Ֆրանսիայում, ապա այն սկսել է տարածվել ամբողջ աշխարհում՝ դառնալով ավանդաբար նշվող տոն։ Այժմ այն նշվում է աշխարհի շատ երկրներում, այդ թվում՝ Հայաստանում:

Թատրոնի համաշխարհային օրվա առթիվ առաջին միջազգային ուղերձը 1962թ. հղել է ֆրանսիացի գրող և նկարիչ Ժան Կոկտոն:

Օրվա նշանաբանն էր «Թատրոնը որպես փոխըմբռնման և ազգերի միջև խաղաղության ամրապնդման միջոց»: Այդ օրվանից, յուրաքանչյուր տարվա մարտի 27-ին աշխարհի տարբեր անկյուններում թատրոնները ներկայացնում են իրենց լավագույն բեմադրությունները, զբաղվում են բարեգործական ելույթներով:

Բացի այդ, աշխարհի տարբեր երկրներում այդ օրը բացվում են փառատոներ:

1999-ից սկսած, մարտի 27-ին Հայաստանում կազմակերպվում է «Արտավազդ» թատերական մրցանակաբաշխությունը:

Մշակույթի նախարար Հասմիկ Պողոսյանը օրվա առիթով ուղերձ է հղել՝ շնորհավորելով թատերարվեստի գործիչներին.

«Ջերմորեն շնորհավորում եմ Ձեզ թատրոնի միջազգային օրվա կապակցությամբ: Այս տոնը մեր մշակութային կյանքի սիրված ու սպասված տոներից է: Եվ դա բնական է, քանզի թատրոնը մեր ժողովրդի պատմական ընթացքի մշտական ուղեկիցն է:

Աշխարհին թատերական գործիչների մի ողջ աստղաբույլ տված ժողովուրդը հարկ է, որ ունենա նրանց անվանն ու վաստակին արժանի թատրոն: Սա անսակարկելի համոզմունք է: Եվ ուրախությամբ պետք է փաստեմ, որ այսօր ևս մեր թատերական գործիչները շարունակում են ոչ միայն հայ թատրոնի դարավոր ավանդույթների կրողը լինել, այլև հարստացնել ու նոր որակ հաղորդել նրան:

Հարգելի՛ գործընկերներ

Թատրոնի միջազգային օրվա առթիվ մաղթում եմ թատերական բոլոր գործիչներին և թատրոնի նվիրյալներին արևշատություն, ստեղծագործական անհատնում եռանդ ու նոր խիզախումներ»:

Այսօր կայանալու է «Արտավազդ» թատերական մրցանակաբաշխությունը Երևանի Հակոբ Պարոնյանի անվան երաժշտական կոմեդիայի պետական թատրոնում: Մրցանակաբաշխությունը կազմակերպել է Հայաստանի թատերական գործիչների միությունը և այն այս տարի նվիրվում է Հայաստանի թատերական գործիչների միության ստեղծման 70-ամյա հոբելյանին»: