Վարորդները միանգամից հասկացան և շատ շնորհակալ են. Գագիկ Բեգլարյան (տեսանյութ)

Այսօր՝ մարտի 27-ին, տաքսիստները ցույց են կազմակերպել Կառավարության հերթական նախաձեռնության դեմ, ըստ որի՝ դեղին համարանիշները պետք է փոխարինվեն կպչուն ժապավեններով։ 

Ինչպես տեղից հայտնում է Lurer.com-ի թղթակիցը, տաքսիստների կազմակերպած ցույցին ներկա են ԲՀԿ-ական պատգամավորներ Վարդան Օսկանյանը, Վահե Էնֆիաջյանը, ինչպես նաև Կապի և տրանսպորտի նախարար Գագիկ Բեգլարյանը:

Նշենք, որ պատգամավորներից և ոչ ոք չմոտեցավ տաքսիստներին:

Ներկա էր մոտ 40 տաքսիստ, այդ թվում՝ «Քաղաքացիական դիրքորոշում» հկ-ի նախագահ Գևորգ Դոստուրյանը, ով մոտ մեկ ու կես ժամ զրուցեց նախարարի հետ: Հանդիպումից հետո Գագիկ Բեգլարյանը լրագրողների հետ զրույցում ասաց.

«Մենք իրենց հետ էլ ենք զրուցել, վարորդները մանրամասն չգիտեն, որ իրենք ամսեկան 15.000 դրամ շահելու են: Սպիտակ համարանիշներով մեքենաների տերերը գիտեն, որ չեն կարող միայն հարկը վճարելով դաշտ մտնել: Կան կազմակերպություններ, որոնք վարորդներին թալանում են. եթե հաշվում ենք, բավականին մեծ գումարներ են այդ կերպ աշխատում։ Այսօր վարորդները եռամսյակային 12.000 դրամ գումարը վճարելու են և աշխատելու են, իրենց երեք օրվա եկամուտը տալու են և երեք ամիս մնալու են դաշտում»,-ասաց Կապի և տրանսպորտի նախարար Գագիկ Բեգլարյանը:

Հարցին, թե փաստորեն ՀԿ-ներն են տաքսիստներին թյուրիմացության մեջ գցել, նախարարը պատասխանեց.

«Այո՛, թյուրիմացության մեջ են գցում, ես իրենց հասկանում եմ։ Այսօր մի քանի ՀԿ-ներ կան, որ մեծ գումարներ են կորզում տաքսիստների հաշվին։ Երբ զրուցեցի վարորդների հետ, նրանք միանգամից հասկացան և շատ շնորհակալ են, մնացած բոլորը շոու է, կազմակերպված է զուտ գումար աշխատելու համար»,-հավելեց նախարարը։