Սեմինար ԱԻ նախարարությունում

Այսօր ԱԻ նախարարությունում տեղի ունեցավ ՀՀ գործադիր մարմինների քաղաքացիական պաշտպանության պատասխանատուների հետ համատեղ սեմինար-խորհրդակցություն: Սեմինարին մասնակցում էին ՀՀ գործադիր մարմինների ներկայացուցիչներ, ԱԻՆ զորահավաքային նախապատրաստության, պետպահուստի պլանավորման և ՔՊ ծրագրերի վարչության, ՓԾ քաղաքացիական պաշտպանության միջոցառումների կազմակերպման վարչության աշխատակիցներ:

Խոսելով սեմինարի գլխավոր թեմայի և հանդիպման նպատակների մասին` ԱԻՆ զորահավաքային նախապատրաստության, պետպահուստի պլանավորման և ՔՊ ծրագրերի վարչության պետ Ա. Կարապետյանն ասաց.

- Մեր երկրում շատ են կարևորվում քաղաքացիական պաշտպանության խնդիրները: Մեր վերջին հանդիպումից հետո մի շարք փաստաթղթեր են ընդունվել: Մենք աշխատում ենք, փորձն օգտագործելով, քաղաքացիական պաշտպանությանը վերաբերող օրենքներում փոփոխություններ մտցնել` մեր աշխատանքն ավելի արդյունավետ դարձնելու համար: Այսօրվա հանդիպման գլխավոր նպատակն է ներկայացնել, թե ինչ փոփոխություններ են կատարվել այդ օրենքներում:

Սեմինարի ընթացքում մասնակիցներին ներկայացվեց հանրապետական գործադիր մարմինների ՔՊ կառավարման համակարգը, ՔՊ ուսումնավարժությունների նախապատրաստման և անցկացման մեթոդիկան, ՀՀ պետական կառավարման մարմինների կողմից վտանգավոր տարածքից բնակչության տարհանման և կենսապահովման գործընթացների պլանավորման կազմակերպումը:

Նշված հարցերի շուրջ ծավալվեց ակտիվ քննարկում, որտեղ ավելի մանրամասն անդրադարձ եղավ տեղական ինքնակառավարման, ՔՊ ստորաբաժանումների և արտակարգ իրավիճակներում բնակչության պաշտպանության մասին ՀՀ օրենքներում փոփոխություւներ և լրացումներ կատարելու վերաբերյալ ՀՀ օրենքների նախագծերին: