Մեծարվեց անվանի վիրաբույժը

Երևանի Մխիթար Հերացու անվան պետական բժշկական համալսարանում մարտի 27-ին կայացած գիտական խորհրդի հատուկ նիստը նվիրված էր Երևանի Մ. Հերացու անվան պետական բժշկական համալսարանի վիրաբուժության թիվ 3 ամբիոնի վարիչ, ՀՀ առողջապահության նախարարության գլխավոր վիրաբույժ, «Էրեբունի» բժշկական կենտրոնի ընդհանուր վիրաբուժության կլինիկայի ղեկավար, բժշկական գիտությունների դոկտոր, պրոֆեսոր Հովհաննես Սարուխանյանի ծննդյան 75-ամյակին և աշխատանքային գործունեության 50-ամյակին։

Նիստին մասնակցեց Հայաստանի Հանրապետության նախագահ Սերժ Սարգսյանը, ով անձամբ իր և ժողովրդի անունից շնորհակալություն հայտնեց անվանի վիրաբույժին բեղմնավոր գործունեության համար։

Նախագահ Սերժ Սարգսյանի հրամանագրով, բժշկագիտության զարգացման գործում ունեցած ակնառու վաստակի, առողջապահության բնագավառում ներդրած նշանակալի ավանդի, ինչպես նաև աշխատանքային գործունեության ընթացքում ցուցաբերած անմնացորդ նվիրումի համար Հովհաննես Սարուխանյանը պարգևատրվեց «Հայրենիքին մատուցած ծառայությունների համար» 1-ին աստիճանի մեդալով:

Ներկայացնելով անվանի վիրաբույժի գործունեությունը ՀՀ առողջապահության նախարար, պրոֆեսոր Դերենիկ Դումանյանն ասաց.

«Հայաստանի Հանրապետության մեծարգո նախագահ,

Գիտական խորհրդի հարգելի անդամներ, հյուրեր, ինձ համար մեծագույն հաճույք և նաև մեծ հպարտություն է ներկայացնել մի մարդու, ով իր 50-ամյա բեղմնավոր աշխատանքի, սիրելի մասնագիտության նկատմամբ ունեցած նվիրումի շնորհիվ արդեն երկար տարիներ ընկալվում է որպես առողջապահության համակարգի նահապետ։

Այս դահլիճում դժվար թե գտնվի մեկը, ով այս կամ այն չափով ծանոթ չլինի Հովհաննես Սարուխանյան վիրաբույժին ու նրա գործունեությանը։ Գուցե թե ոմանք մանրամասնորեն չիմանան, թե վաստակաշատ վիրաբույժը ինչ գյուտերի կամ վիրահատական ինչ նոր մեթոդների հեղինակ է։ Սակայն բոլորս համոզված ենք ակնհայտ մի ճշմարտության մեջ. Հովհաննես Սարուխանյանի ծննդյան 75-ամյա հոբելյանը և աշխատանքային գործունեության 50-ամյակը ոչ թե հերթապահ բարեմաղթանքների ու բարի ցանկություննների առիթ է, այլ սրտաբուխ, անկեղծ խոսք ասելու հնարավորություն մի մարդու, ով ճիշտ ապրած իր կյանքի պտուղներն է քաղում։

Անվանի վիրաբույժին երախտիքի խոսքեր ասելու բազում առիթներ ունենք։ Կան վիրահատություններ, ինչպես ասենք՝ զույգ թոքերի միանվագ տրանսպլանտացիայի մոդելը, որ Հովհաննես Սարուխանյանը ԽՍՀՄ-ում առաջինն է մշակել և կատարել։ Ուսումնասիրել և Հայաստանում առաջինն է ներդրել բազմաթիվ այլ՝ սրտանոթային, կրծքային, ստամոքս-աղիքային, ենթաստամոքսագեղձի, էնդոկրին հիվանդությունների և այլ վիրահատություններ։ Նա հեղինակ է վիրահատական մի շարք նոր մեթոդների, որոնք ճանաչվել են որպես գյուտեր: Եվ այս ամենի շնորհիվ Հովհաննես Սարուխանյանը ոչ միայն բարի համբավ է ձեռք բերել, այլեւ իր դպրոցի արժանի հետեւորդներ դաստիարակել։ Պատահական չէ, որ նրա աշակերտներից շատերն այսօր հանրապետության տարբեր կլինիկաներում վիրաբուժական ծառայություններ են ղեկավարում. նրանցից 7-ը բժշկագիտության դոկտորներ են, 23-ը՝ թեկնածուներ։ Հովհաննես Սարուխանյանին բնորոշ մարդկային բարձր արժանիքները, սակայն, նրան մղում են հպարտանալու ոչ թե իր ստեղծածով ու սաներով, այլ՝ իր ուսուցիչներով։ Իսկ նրա ուսուցիչները մեր հանրապետության վիրաբուժության հիմնադիր գիտնականներն են, այդ թվում նրա տղանդավոր հայրը' Վազգեն Սարուխանյանը, ով որդուն նաև պատգամել է, որ բժշկի կոչումն առաջին հերթին հիվանդի կողքին լինելն է։

Պրոֆեսոր Սարուխանյանի հարյուրավոր հիվանդները, որպես կանոն, չեն իմանում, որ իրենց բժիշկը գյուտարար կամ դասագրքերի ու մենագրություների հեղինակ է։ Դրա փոխարեն նրանք յուրաքանչյուր օր սիրելի բժշկի նվիրված աշխատանքի արդյունքի ականատեսն են դառնում ու վայելում նրա ջերմ վերաբերմունքը։

Դժվար է պատկերացնել ավելի բարձր գնահատական, քան այն, որ Հովհաննես Սարուխանյանով ժամանակին հպարտացել են նրա ուսուցիչները, իսկ այսօր՝ աշակերտները, հիվանդներն ու ընկերները։

Ականավոր մասնագետի հաջողության գրավականներից մեկը գործնական վիրաբուժությունը բժշկագիտության ու դասախոսական գործունեության հետ մշտապես զուգորդելն է։ Արդեն 25 տարի է, ինչ Հովհաննես Սարուխանյանը Երևանի Մ. Հերացու անվան պետական բժշկական համալսարանի վիրաբուժական հիվանդությունների ամբիոնի վարիչն է և նույն համալսարանի վիրաբուժության մասնագիտական խորհրդի անդամը։ Քառորդ դարից ավելի է, ինչ վիրաբույժների Հայկական ասոցիացիայի նախագահն է և առողջապահության նախարարության գլխավոր վիրաբույժը։ Նա նաև ՀՀ պաշտպանության նախարարության ու ոստիկանության գլխավոր բժիշկ-խորհրդատուն է։

Հովհաննես Սարուխանյանի գիտագործնական բեղմնավոր գործունեությունն ու պրպտուն միտքը նրան կարծես պարտադրում էին դուրս գալ նեղ մասնագիտության սահմաններից։ Միջճյուղային սերտ համագործակցությամբ, միացյալ ուժերով վիրաբուժության հիմնական ուղղությունների զարգացմանը նպաստելու առաքելությամբ էր, որ 2000 թվականին նա նախաձեռնեց առաջատար գիտնական վիրաբույժների համախմբումը «Հայկական վիրաբուժություն XXI պրոֆեսիոնալների միություն» հասարակական կազմակերպությունում, որի արդյունավետ աշխատանքն առ այսօր ղեկավարում է։

Առողջապահության բնագավառում ունեցած ակնառու ձեռքբերումների, անբասիր գործունեության, Հայաստանում առողջապահության և բժշկագիտության զարգացման համար վաստակաշատ բժիշկ-գիտնական Հովհաննես Սարուխանյանն արժանացել է «Աշխատանքային կարմիր դրոշի» շքանշանի, «Մխիթար Հերացի» մեդալի, ինչպես նաև «Հայաստանի Հանրապետության գիտության վաստակավոր գործիչ» բարձրագույն կոչմանը։

Պրոֆեսոր Սարուխանյանի հայրենասիրական խառնվածքն ընդգծվել է պատերազմական իրավիճակներում։ Դրա շնորհիվ է, որ նրա պարգևներին ավելացել են Հայաստանի սահմանների պաշտպանության և Արցախի ազատամարտին ակտիվ մասնակցության համար ստացած «Մարշալ Բաղրամյան» և «Անդրանիկ Օզանյան» մեդալները։

Կարելի է անվերջ խոսել հրաշալի մասնագետի ձեռքբերումների ու վիրաբուժության մեջ նրա ունեցած մեծ ավանդի և հիմնած դպրոցի մասին։ Սակայն չմոռանանք, որ Հովհաննես Սարուխանյանի համար միշտ էլ առավել կարևորը սիրած մասնագիտությանն անմնացորդ նվիրումն է և իր հիվանդների ապաքինումը։

Մեծարգո նախագահ, թույլ տվեք, Հայաստանի բուժաշխատողների անունից շնորհակալություն հայտնել Ձեզ՝ Հովհաննես Սարուխանյանի մեծ վաստակի ու նվիրումի հանդեպ Ձեր կողմից ցուցաբերված արժանի ուշադրության և այսօրվա մասնակցության համար։

Եվս մեկ անգամ շնորհավորելով մեծ գիտնական, տաղանդավոր վիրաբույժ, անկրկնելի մանկավարժ և վերջապես՝ իսկական նվիրյալ բժիշկ Հովհաննես Սարուխանյանին ծննդյան 75-ամյակի և աշխատանքային 50-ամյա գործունեության կապակցությամբ, մաղթում եմ նրան ամուր առողջություն և երջանիկ կյանք։

Հարգելի պրոֆեսոր, ցանկանում եմ, որ Ձեր բեղուն գործունեությամբ և ներկայությամբ դեռ երկար տարիներ իմաստնավորեք առողջապահության մեր համակարգը»։