Արգամիչի նախագահական «շքահանդեսը»

Այսօր՝ Թատրոնի միջազգային օրվա կապակցությամբ, թատերական աշխարհի մեկենաս Հովիկ Աբրահամյանը վերջապես որոշել է բացահայտվել և գոնե ա՛յս օրով, գոնե թատերարվեստի ներկայացուցիչների աչքի առաջ, գոնե մեկ անգամ խաղալ իր երազած ամենամեծ դերը՝ ներկայանալ ճիշտ այնպես, ինչպես ներկայանում է Հայաստանի Հանրապետության նախագահը:

Խորհրդարանի պաշտոնական կայքում զետեղված ծանուցումը՝ Արգամիչի այսօրվա «արկածների» վերաբերյալ՝ կից ներկայացվող լուսանկարներով, պարզապես ցնցող է. Ազգային ժողովի ոսկեզօծ դահլիճը ճիշտ այնպիսի տեսքի է բերվել, ինչպիսի տեսք որ ունի Բաղրամյան 26-ի համապատասխան դահլիճը, որտեղ երկրի ղեկավարն ընդունում և պարգևատրում է իր կողմից պատվի արժանացածներին: Ճիշտ նույն ոգով էլ, փորձ է արվել ո՛չ միայն արտաքնապես, այլև բովանդակային առումով էլ չզիջել ՀՀ նախագահի արարողակարգին:

Հենց այս տրամաբանության մեջ էլ հարկավոր է դիտարկել նաև Հովիկ Աբրահամյանի այցն իր կյանքի իմաստուն շրջանն ապրող Սոս Սարգսյանին. Սերժ Սարգսյանն էլ սովորություն ունի պարբերաբար այցելել մեր մեծերին՝ ընդգծելով վաստակ ունեցողների հանդեպ տածած իր հատուկ վերաբերմունքը: Սարգսյանից հետ չմնալու համար Աբրահամյանն այս այցելությունը զարդարել է նաև մեդալ շնորհելով. Սոս Սարգսյանը Հովիկ Աբրահամյանից ստացել է ԱԺ Պատվո մեդալ:

Իսկ արդեն թատերարվեստի մյուս գործիչները, որոնց ԱԺ նախագահը (պատահական չէր, փաստորեն, որ մի անգամ Աբրահամյանն ի պատասխան լրագրողների հարցադրման, վրա բերեց՝ «նախագա՛հ եմ, էլի՛») հյուրընկալել է իր նստավայրում, ինչպես ընդունված է ՀՀ նախագահների արարողակարգով, նախ ողջունել է հատուկ այս օրվա համար գրված ճառով, որից հետո արժանացրել պարգևների: Ընդ որում, ուշադրություն՝ նման քանակությամբ, նման մեդալների ու պատվոգիր-շնորհակալագրերի բաշխումը ևս նախագահական արարողակարգի անմիջական ընդօրինակման վառ վկայություն է:

«Մարտի 27-ին Ազգային Ժողովի նախագահ Հովիկ Աբրահամյանը Թատրոնի միջազգային օրվա կապակցությամբ մշակույթի բնագավառում ներդրած նշանակալի ավանդի համար ԱԺ Պատվո մեդալներով պարգևատրեց ոլորտի մեկ տասնյակից ավելի գործիչների՝ Վարդուհի Վարդերեսյանին, Երվանդ Ղազանչյանին, Լեյլի Խաչատրյանին, Մարգո Մուրադյանին, Էվելինա Շահիրյանին, Ալեքսանդր Գրիգորյանին, Կամո Հովհաննիսյանին, Սիլվա Յուզբաշյանին, Բարսեղ Թումանյանին, Գեղանուշ Սայադյանին: ԱԺ նախագահի պատվոգրերով ու շնորհակալագրերով պարգևատրվեցին թատերական արվեստի շուրջ հինգ տասնյակ գործիչներ»:

Կարծում ենք, մեկնաբանություններն այլևս ավելորդ են…

Լուսինե Կեսոյան

{gallery}1{/gallery}