«168 ժամ». Մրցունակության հիմնադրամի և Կառավարության տարածաշրջանային ծրագիրն իրականանում է

Ուռուցքաբանության գերազանցության հայկական կենտրոնի կառուցման աշխատանքները մեծ թափով առաջ են գնում:

Հայաստանի ազգային մրցունակության հիմնադրամի միջնաժամկետ նպատակը առողջապահության ոլորտում մրցունակության մակարդակի բարձրացումն է: Հայաստանի վարչապետ Տիգրան Սարգսյանի նախաձեռնությամբ և հայազգի անվանի գործարարների ջանքերով ձևավորված այս մոտեցումը դարձավ առողջապահական մի տարածաշրջանային ծրագրի նախաքայլը, որի իրականացմանը մեկնարկը տրվեց 2012թ. հոկտեմբերին:

Մշակվեց Ուռուցքաբանության գերազանցության հայկական կենտրոնի ծրագիրը, որի գլխավոր նպատակն է՝ հիմք դնել Հայաստանի Հանրապետությունում գերժամանակակից միջուկային տեխնոլոգիաների վրա հիմնված բժշկության զարգացմանը և խթանմանը: Խնդիր էր դրված ոչ միայն բավարարել ՀՀ ազգաբնակչության օրեցոր աճող կարիքները, այլև նախադրյալներ ստեղծել արտասահմանից հիվանդներին բուժելու և այդպիսով առողջապահական զբոսաշրջությունը զարգացնելու համար:

ՀՀ բնակչության շրջանում ոչ վարակիչ հիվանդություններից մահացության կառուցվածքում չարորակ նորագոյացություններից մահացությունը զբաղեցնում է երկրորդ հորիզոնականը արյան շրջանառության համակարգի հիվանդություններից հետո (20.08%): Ըստ Համաշխարհային առողջապահության կազմակերպության՝ 2000թ.-ից սրտանոթային հիվանդություններից մահացության տարեկան միջին տվյալներն են՝ 4306 դեպք 100 հազար բնակչության հաշվով: Ցավալի է նշել, որ յուրաքանչյուր տարի քաղցկեղից հանրապետությունում հաշմանդամ է դառնում շուրջ 2700 մարդ: ՀՀ ազգային վիճակագրական ծառայության տվյալներով' 2009 թվականին Հայաստանում գրանցվել են 36971 քաղցկեղով հիվանդներ, իսկ 2008 թվականին գրանցված 28692 հիվանդներից 5492-ը մահացել են: Դա բավականին մեծ թիվ է 3 մլն բնակչություն ունեցող երկրի համար:

Այս մարտահրավերները դիմագրավելու և մարդու առողջության պահպանման, հիվանդությունների կանխարգելման, կյանքի որակի բարելավման նպատակով Մրցունակության հիմնադրամի ծրագիրը նախատեսում է ներդնել բժշկական ծառայությունների ապահովման միանգամայն նոր որակ և նոր մոտեցումներ: Դրանք ողջ աշխարհում փորձված նորարարական լուծումներն են, արդի բժշկության նոր սկզբունքները և բուժման ողջ գործընթացի ապահովման արդյունավետ մեխանիզմները:

Այս ամենի շնորհիվ, ծրագրի իրականացման արդյունքում, փաստորեն, հնարավորություն է ստեղծվում Հայաստանը դարձնել ազգային և տարածաշրջանային ուռուցքաբանության և միջուկային բժշկության կենտրոն: Դրանով իսկ հնարավոր կլինի բազմակիացնել Հայաստանի բրենդի՝ աշխարհում առաջմղման հարթակները՝ ձևավորելով նոր այցեքարտ: Ուստի ուրախալի է, որ պետությունը բարձր ուշադրության և հետևողականություն է ցուցաբերում այս ծրագրի նկատմամբ:

Թերևս դա է պատճառը, որ տեխնիկապես բավականին բարդ այս շինարարությունը զարմանալիորեն արագ է ընթանում: Կենտրոնի հիմնարկեքի արարողությունը տեղի ունեցավ ընդամենը անցած աշնանը: Ի դեպ, միջոցառմանը ներկա էր ՀՀ նախագահ Սերժ Սարգսյանը, ով ավելի ուշ՝ քարոզարշավի ընթացքում, հայտարարել էր. «Մենք պարտավորվել ենք Հայաստանը դարձնել առողջապահության գերազանցության տարածաշրջանային կենտրոն և չենք շեղվելու ստանձնած պարտավորություններից»: Այսպես, կենտրոնի ուռուցքային հիվանդությունների ախտորոշման մասնաշենքի արտաքին և կրող կոնստրուկցիաների կառուցման շինարարական աշխատանքները, մեկնարկելով հոկտեմբերին, այժմ արդեն գտնվում են ավարտման փուլում:

Հարկ է նշել, որ այս ընթացքում տեղ են գտել մի շարք նախագծային փոփոխություններ, որի արդյունքում իրականացվել է ծրագրային բյուջեի զգալի խնայողություն. այն նախատեսվում է ուղղել ծրագրի մյուս փուլերի իրագործմանը: Բացի այդ, հաստատվել է նաև կենտրոնի հետագա շահագործման կազմակերպման մոդելը պետական-մասնավոր համագործակցության շրջանակներում:

Կենտրոնի շինարարությանը համընթաց արագորեն ընթանում են հայաստանյան միջավայրում վերոնշված միջազգային լավագույն փորձի, գիտելիքների և մեխանիզմների ողջ համալիրի ներդրման ուղղությամբ աշխատանքները: Պարզ է, որ գերժամանակակից բուժսարքավորումներով հագեցած հաստատությունում մասնագետները պետք է աշխատեն նոր գիտելիքներով:

Այդ իսկ պատճառով Տեխասի համալսարանի «Էմ Դի Անդերսոն» (MD Anderson) ուռուցքաբանության կենտրոնի կողմից ՀԱՄՀ-ին տրամադրվել է միջազգային չափանիշներին համապատասխան բուժման գործիքակազմ՝ օնկոհեմատոլոգիական հիվանդությունների բուժման ընթացակարգի շուրջ 39 պրակտիկ մեթոդաբանական ուղենիշներ, չափորոշիչներ ու պրոտոկոլներ: Համագործակցության հայեցակարգը նախատեսում է ուռուցքաբանական այլ պաթոլոգիաների ախտորոշման ու բուժման ընթացակարգերին առնչվող չափորոշիչների և պրոտոկոլների ստացում: Միևնույն ժամանակ, համաձայնություն է ձեռք բերվել, ըստ որի նախատեսվում է հայաստանյան մասնագետների պարբերաբար վերապատրաստում:

Կենտրոնի գործարկմանը զուգահեռ նախատեսվում է նաև իրականացնել նրա միջազգային հավատարմագրումը ԱՄՆ-ում, ինչը, փաստորեն, հավաստելու է կենտրոնի կողմից մատուցվող ծառայությունների համապաստախանությունը միջազգային չափանիշներին և չափորոշիչներին: Վերջինս հանդիսանում է շատ կարևոր նախապայման կենտրոնը տարածաշրջանային քարտեզի վրա տեղակայելու համար:

Հուսանք, որ պետական-մասնավոր համագործակցությամբ իրականացվող մրցունակության հիմնադրամի այս ծրագիրը հաջողությամբ կպասկվի: