Զատկի ձուն միմիայն կարմիր պետք է ներկել, մյուս գույները հորինված են

«Այս շաբաթը կոչվում է ավագ շաբաթ և մեծ պահքի հանգրվանի շաբաթ: Ավագ շաբաթվա ամեն օրն ունի իր հոգևոր խորհուրդները՝ ուղղված մարդկանց»,- այսօր՝ մարտի 28-ին, լրագրողների հետ հանդիպմանն ասաց Տեր Կարապետ քահանա Կարապետյանը՝ խոսելով Սուրբ Զատիկի նշանակության և ծիսակարգի մասին:

Ներկայացնելով ծիսակարգի արարողությունն ու նշանակությունը՝ Տեր Կարապետ քահանա Կարապետյանն ասաց, որ մեր սեղաններին պետք է դրված լինի ավանդական փլավը, ձուկը և կարմիր ներկած ձուն:

«Միմիայն կարմիր պետք է ներկել ձուն՝ Քրիստոսի արյան գույն, մյուս գույները հորինված են»,-ասաց քահանան:

Տեր Կարապետ քահանան խոսեց նաև սխալ ավանդույթի մասին, որն ընդունված է ժողովրդի մեջ.

«Քրիստոսի հարության օրը չեն գնում գերեզմաններ, հաջորդ օրը մեռելոց է, և հենց այդ օրը կարող են տանել մեր ննջեցյալներին Քրիստոսի հարության լուրը»։