Նախապատրաստվում է հայ-ամերիկյան վարժանք

Մարտի 28-ին ՀՀ ԱԻ նախարարությունում փրկարար ծառայության տնօրեն, գեներալ-մայոր Ս. Ազարյանն ընդունել է ԱՄՆ Կանզասի ազգային գվարդիայի պատվիրակությունը, որի կազմում ընդգրկված էին ԱՄՆ դեսպանատան Հայաստան-Կանզաս երկկողմանի հարաբերությունների գծով սպա, կապիտան Ահարոն Այզեքսոնը, Հայաստան-Կանզաս երկկողմանի հարաբերությունների գծով փոխգնդապետ Բրենթ Սալմանսը և դեսպանության ռազմական համագործակցության գրասենյակի երկկողմ հարաբերությունների գծով ծրագրի համակարգող Անի Մելքումյանը։

Հանդիպման հիմնական նպատակներն էին քննարկել ամռանը Երևանում կայանալիք հայ-ամերիկյան շտաբային ուսումնավարժության կազմակերպչական և ՃԿԿ մարդուն հրատապ օգնության «911» ծառայության աշխատակիցների համար վերապատրաստման դասընթացներ անցկացնելու հարցերը։

ՓԾ տնօրեն Ս. Ազարյանը հյուրերին ներկայացրեց մինչ հիմա ճգնաժամային կառավարման կենտրոնի և «911» ծառայության զարգացման ուղղությամբ արված աշխատանքները՝ նշելով, որ մոտ ապագայում նման կենտրոններ կստեղծվեն նաև ՀՀ մարզերում։

Հայաստան-Կանզաս երկկողմանի հարաբերությունների գծով փոխգնդապետ Բրենթ Սալմանսը, ողջունելով այդ նախաձեռնությունը, նշեց. «Մենք բարձր ենք գնահատում ԱԻ նախարարության արագ զարգացումը և շատ ուրախ ենք դրա համար։ Կարծում եմ, որ ամռանը նախատեսվող վարժանքը նաև շատ լավ հնարավորություն կլինի ստուգելու ձեր նորակառույց ճգնաժամային կառավարման կենտրոնի և «911» ծառայության աշխատանքը։ Մենք ևս պատրաստ ենք աջակցելու այդ նպատակով վարժանքների ու որակավորման բարձրացման դասընթացների կազմակերպման գործերում»։

Հանդիպման ընթացքում ձեռք բերված պայմանավորվածության համաձայն՝ կանցկացվի ՀԱԷԿ-ի պայմանական վթարի սցենարով վարժանքի պլանավորման կոնֆերանս, որին կհրավիրվեն վարժանքին մասնակցող բոլոր տեղական ու միջազգային կառույցների ներկայացուցիչները։