Մարիին վիրահատել են

Ի՞նչ են խոսում. երգչուհի Մարիին վիրահատել են:

Իրականում. լուրը ճշտելու համար խոսեցինք երգչուհու հետ, ով հաստատեց դրա իսկությունը: Վերջերս նոր տեսահոլովակով հանդես եկած Մարին պատմեց, որ ժամանակին էլ գանգատներ և որովայնի շրջանում ցավեր է ունեցել. «Հենց փորիս հատվածում ցավեր էի ունենում, մտածում էինք, հավանաբար կույրաղիքս է. այդպես մի քանի անգամ դիմել ենք բժշկի, ասել են՝ լուրջ բան չկա, բայց կարելի է հեռացնել այն»:

Երգչուհին խոստովանեց, որ չի սիրում տաք հագնվել, ինչն էլ, հավանաբար, նման հետևանքների է բերել: «Օրեր առաջ սենյակիս պատուհանը գիշերը բաց էի թողել և քնել: Կեսգիշերն անց ցավեր ունեցա, որը տևեց ամբողջ գիշեր: Գնացինք հիվանդանոց և պարզվեց, որ պետք է վիրահատեն ինձ ու հեռացնեն կույրաղիքս,-esyes.am-ին ասաց Մարին ու շարունակեց. -Վերջերս դիտել էի «Նարկոզ» ֆիլմը, որից հետո որոշել էի, որ երբեք վիրահատության չեմ գնա, որովհետև ֆիլմը նայելիս սարսափելի ապրումներ եմ ունեցել»:

Պարզվում է, երգչուհին ոչ այնքան վիրահատությունից էր վախենում, որքան անզգայացումից, ինչի պատճառով էլ որոշել է զանգել բոլոր ընկերներին ու հրաժեշտ տալ. «Այնպես էի վախեցրել բոլորին, որ բժիշկներն ասում էին՝ այս պահին մայրիկդ ավելի շատ օգնության կարիք ունի, քան դու»:

Այս ամենը, սակայն, արդեն անցյալում է, երգչուհու կամքով երեկ նրան դուրս են գրել հիվանդանոցից: «Բժիշկները չէին ուզում ինձ դուրս գրել, բայց ես համոզեցի ու ասացի, որ ինձ խելոք ու տաք կպահեմ, շատ չեմ շարժվի ու կպառկեմ մինչև վերքս լավանա, որ կարողանամ դասի գնալ ու աշխատել»,-եզրափակեց երգչուհին: