Դավիթ Սեխպեյանը՝ Դիանա Գրիգորյանի նոր սերիալում

«Դժվար ապրուստի» ավարտից հետո Դիանա Գրիգորյանը ձեռնամուխ է եղել նոր հեռուստասերիալի նկարահանմանը, որի համար տևական ժամանակ է, ինչ նա քասթինգ էր անցկացնում: Հեռուստասերիալը եթերում կլինի ապրիլից:

Նախորդ հեռուստասերիալի ավարտից հետո դերասան Դավիթ Սեխպեյանից հետաքրքրվեցինք առաջիկա անելիքների մասին և ճշտեցինք արդյոք այլ հեռուստասերիալներում զբաղվածություն ունի: Դավիթը esyes.am-ին հայտնեց, որ առաջիկայում չի ցանկանում ներգրավվել երկարաժամկետ հեռուստասերիալներում, սակայն Դիանա Գրիգորյանի նոր հեռուստանովելում մասնակցություն ունի:

Թատրոնի հանդիսատեսը Դավթին հասցրել է տարբեր կերպարներով տեսնել, հեռուստադիտողները նրան տեսել են Չարլիի, Նոյի, այժմ էլ խոհարարի տեսքով: Սակայն սա առայժմ. շուտով եթերում կլինի նոր հեռուստասերիալը, որում Դավիթը մարմնավորում է հանցագործ աշխարհի ներկայացուցչի: esyes.am-ի հետ զրույցում նա հայտնեց, որ իր դերը երկարաժամկետ չէ. «Չորս սերիայում եմ խաղալու: Այս պահին չեմ ցանկանում երկարաժամկետ հեռուստասերիալներում խաղալ,- նշեց Դավիթն ու հավելեց, որ դա պայմանավորված չէ այն հանգամանքով, որ հեռուստասերիալները շատ են քննադատվում: -Ես կարծում եմ՝ սխալ է, երբ պրոֆեսիոնալ մարդիկ մի կողմ են քաշվում և ասում, որ ոլորտը չի զարգանում: Եթե բոլոր պրոֆեսիոնալները միավորնեն մի հեռուստանախագծում, հաստատ հաջողություն կլինի: Ես մեծ մտավախությամբ սկսեցի նկարահանվել հեռուստասերիալներում, բայց, կարծես թե, ստացվեց և հեռուստադիտողներն ընդունեցին ու սիրեցին կերպարս»:

Դավթից պարզեցինք, որ այժմ չի աշխատում Ստանիսլավսկու անվան ռուսական դրամատիկական թատրոնում: Վերջերս հանդես է եկել «Թատրոն 32»-ի «Պարույր Սևակ» ներկայացման մեջ: Թատրոնում հանդես է գալիս համապատասխան հրավերների դեպքում, իսկ հեռուստատեսությամբ վարում է «Հեռուստախոհանոց» ծրագիրը: Դերասանը նշեց, որ իրեն շատ է դուր գալիս հեռուստատեսային իր նոր՝ խոհարարի կերպարը:)
Վերջերս ամուսնացած Դավթից հետաքրքրվեցինք նաև, արդյոք առաջիկայում իր ընտանիքում համալրում է սպասվում և ճշտեցինք, որ Դավիթն ու Նարինեն առայժմ բալիկի չեն սպասում: