Սիմա Բաղդասարյանը՝ կարիերայի եւ անձնական կյանքում փոփոխության մասին

“Արմենիա” հեռուստաընկերության “Խաղից դուրս” սերիալի դերասանուհիներից Սիմա Բաղդասարյանը BRAVO.am-ի հետ զրույցում անկեղծորեն խոսել է իր կարիերայի, դերասանական խաղի, նախասիրությունների ու անձնական կյանքում տեղի ունեցած փոփոխության մասին։

Մասնագիտությամբ ատամնաբույժ եմ: Մեր ընտանիքում բոլորն էլ բժիշկներ են: Այդպես գեներով ես էլ ընտրեցի ատամնաբույժի մասնագիտությունը: Ուսումս ավարտելուց անմիջապես հետո անցել եմ աշխատանքի:

Մուտքս հեռուստատեսային աշխարհ եղել է շատ պատահական՝ “Կյանքի գինը 2” հեռուստասերիալով: Ծանոթս առաջարկեց, ես էլ որոշեցի փորձել: Մերիի կերպարն եմ մարմնավորել: Դերս շատ փոքրիկ էր. խաղացել եմ ընդամենը 1 ամիս:

“Արմենիա” հեռուստաընկերությունում պաշտոնապես աշխատում եմ 2011թվականից, երբ սկսեցի վարել “Բարի լույս, հայեր” հաղորդման “Առողջության օրագիրը”:

Առանց մասնագիտական կրթության ու հաղորդում վարելու փորձի հայտնվեցի ուղիղ եթերում: Պատասխանատվությունը շատ մեծ էր: Կարծում եմ՝ ստացվել է:

Մասնագիտական խորհուրդներով ինձ շատ օգնել է Արամ Չախոյանը, ով այս ասպարեզում արդեն երկար տարիների փորձ ունի: Հետագայում սկսեցի շփվել ոլորտի այլ մարդկանց հետ եւս ու հասկանալ մասնագիտական նրբությունները:

Այժմ նկարահանվում եմ “Խաղից դուրս” հեռուստաֆիլմում՝ մարմնավորելով բացասական հերոսներից մեկին՝ Դանային: Պետք է անկեղծ լինեմ՝ այնքան էլ չեմ հավանում ինձ այս սերիալում. թվում է՝ մի քիչ ավելի եմ խաղում:

Երբ զգում եմ, որ խաղիս մասին վատ ինչ-որ բան են ասելու, ինքնապաշտպանվում եմ՝ նշելով, որ ես դերասան չեմ: Բայց շատերի կարծիքով՝ վատ չեմ խաղում:

Իմ եւ Դանայի միակ նմանությունը ուժեղ բնավորությունն է:

Ես նպատակասլաց անձնավորություն եմ՝ փոքր-ինչ կարիերիստ: Այդուհանդերձ, ինձ համար առաջնայինն ընտանիքն է, հետո՝ աշխատանքը:

Անձնական կյանքումս փոփոխություն կա. ունեմ ընկեր, որի հետ հանդիպում ենք արդեն 1 տարի: Երկուսս էլ չենք սիրում այդ մասին խոսել:

Արամ Չախոյանի հետ ընկերներ ենք, չէի ասի՝ շատ մտերիմ, բայց անհրաժեշտության դեպքում պատրաստ ենք օգնելու միմյանց: Մեր բաժանության պատճառը կարիերան չի եղել. պարզապես չհասկացանք միմյանց:

Կարծում եմ՝ ընկերասեր եմ: Ընկերներս տարբեր բնագավառից են՝ քաղաքագետ, տնտեսագետ, բժիշկներ… Զբաղվածության պատճառով հաճախ չենք հանդիպում, բայց աշխատում ենք շաբաթական գոնե մեկ անգամ միասին կինո, թատրոն կամ կարաոկե գնալ:

Շատ սիրում եմ հաճախել մարզասրահ, սակայն վերջերս դադարեցրել եմ, իսկ պատճառն աշխատանքային ծանրաբեռնվածությունն է: Մտադիր եմ վերսկսել մարզումներս:

Սիրում եմ երգել: Փոքր ժամանակ շատ աղջիկների նման կանգնել եմ հայելու առաջ ու ինձ երգչուհի երեւակայել: Իսկ բարձրախոսս եղել է սովորական կլոր սանր:):