«Ազգ». Դատական լսումներ Բերեզովսկու մահվան կապակցությամբ

Անգլիայի Վինձոր քաղաքում մարտի 28-ին նախնական լսումներ են սկսվել ռուսաստանցի գործարար Բորիս Բերեզովսկու մահվան փաստի առնչությամբ: ԻՏԱՌ-ՏԱՍՍ-ը հաղորդում է, որ դրանք անցկացվում են աշխարհի առաջատար լրատվամիջոցների լրագրողների ներկայությամբ:

Ներկայիս լսումները կոչվում են կորոներայինՙ կորոներ կոչվող դատական պաշտոնատար անձի անունով, որը պարզում է մահվան հանգամանքները եւ իր դատավճիռն է կայացնում դրա պատճառների առնչությամբ: Եթե կորոներային քննությունը եզրակացնում է, որ մահը բռնի բնույթ է կրում, ապա գործը փոխանցվում է քրեական դատարանին:

Առայժմ հայտնի է, որ Լոնդոնից ոչ հեռու գտնվող եւ Բերեզովսկու նախկին կնոջը պատկանող առանձնատան լոգասենյակում Բերեզովսկու մարմինը գտել ենՙ վզին հանգույց արված ինչ-որ գործվածքի պատառիկով: Մյուս պատառիկն ամրացված է եղել լոգարանի ձողին, որից սովորաբար պլաստիկե վարագույր են կախում: Այս ամենը պատմել է մարտի 23-ինՙ մահվան օրը, առաջինը լոգարան մտած ոստիկանության սպան:

Դիահերձումից հետո հայտնի է դարձել, որ Բերեզովսկու կողերից մեկը կոտրված է: Ըստ որում, մարմնի վրա որեւէ կապտուկ չի հայտնաբերվել: Այդ մասին մարտի 28-ին հաղորդել է «Գարդիան» թերթը, վկայակոչելով հանգուցյալի ընտանիքին:

Մահվան հիմնական վարկածը մնում է ինքնասպանությունը: Նախնական տվյալների համաձայնՙ մահվան պատճառը վերջնականապես պարզելու համար կպահանջվի առնվազն 6 շաբաթ, այնպես որ հուղարկավորությունը տեղի կունենա մայիսին: