«Ազգ». Ծնրադիր վիճակում ուզում է ուրիշներին ծնկի բերել

Հայաստանը դատապարտված է ծնկի իջնելու: Ասում է թուրք գործիչը՝ անտեսելով ե՛ւ «զգոն թուրքերի», ե՛ւ Ադրբեջանի ծնկած վիճակը

Ժողովրդական ասացվածքին համապատասխան «Հավը երազում կորեկ է տեսնում»: Իսկ թուրքերը այլ ժողովուրդների ուզում են իրենց առջեւ ծնկի իջած տեսնել: Օրինակ՝ Իսրայելի վարչապետ Նաթանյահուի ներողության առնչությամբ վարչապետ Էրդողանը հայտարարել էր, թե Իսրայելին ծնկի են բերել թուրք ազգի առջեւ, առանց հաշվի առնելու, որ այդ ներողությունը չի բավարարում թուրքական գեթ մեկ պահանջ:

«Գորշ գայլերի» քաղաքական կազմակերպությանՙ Ազգայնական շարժում կուսակցության պատգամավոր եւ փոխնախագահ Մեւլութ Քարաքայան էլ, ինչպես երեկ նշել էր turkishny.com կայքէջը, հայերին ծնկի բերելու մտավարժանքներ է անում: Թուրք ազգի շատ փառապանծ այս զավակը ադրբեջանական Gun.az գործակալության հարցերին պատասխանելիս ասում է, որ Հայաստանն իսկույն պետք է հեռանա Ղարաբաղից, օկուպացված այս տարածքը պատկանում է թուրքերին, հետեւաբար անհրաժեշտ է հանձնել տիրոջը:

Քարաքայան կարծիք է հայտնում, որ Հայաստանն ի վիճակի չէ երկար ժամանակ օկուպացված պահել Ղարաբաղը, նա դատապարտված է ծնկի իջնելու հետզհետե հզորացող Ադրբեջանի առջեւ, եւ հայ ժողովուրդը պարտավոր է հասկանալ այս իրողությունը:

Այս արարածը հիրավի շատ հոգատար է հայ ժողովրդի հանդեպ, պարզապես նրան հիշողությունն է դավաճանում: 1994-ին Ադրբեջանը զինադադարի աղերսագին խնդրանքով, բացի Հայաստանից, դիմել էր նաեւ Լեռնային Ղարաբաղի Հանրապետությանը, այսինքնՙ ծնկի էր իջել հայկական երկու պետությունների առջեւ:

Ինչ վերաբերում է շատ փառապանծ թուրք ազգին, ապա նրա զգոն զավակներին էլՙ շուրջ 3000 մարդ, 90-ականների սկզբին Ղարաբաղ էր գործուղել «գորշ գայլերի», հետեւաբար Քարաքայայի առաջնորդ Ալփարսլան Թյուրքեշը: «Զգոն թուրք» կոչեցյալ այս վարձու մարդասպանները տեղաբաշխվել էին Ղարաբաղի տարածքում, մասնավորապես Շուշիում եւ Խոջալուում: Սակայն մի մասը շանսատակ արվեց, մյուսըՙ զենքը շպրտելով ազերի եղբայրների հետ հայ ազատամարտիկների բացած միջանցքով ճողոպրեց ռազմի դաշտից, մի մասն էլ հանձնվեց հաղթողների ողորմածությանը, այսինքնՙ ծնկի իջավ հայ ազատամարտիկի առջեւ: Քարաքայան հավ չէ, որ կորեկ տեսնի երազում, սակայն թուրք է, ծնրադիր վիճակում ուզում է ուրիշներին ծնկի բերել: