Ադրբեջանն ու Հայաստանն այս տարի խաղաղ լուծում չեն գտնի. ԼՂՀ վարչապետի հարցազրույցը՝ Reuters-ին

Լեռնային Ղարաբաղի Հանրապետության վարչապետ Արայիկ Հարությունյանը հինգշաբթի օրը Փարիզում Reuters-ին տված հարցազրույցի ժամանակ անդրադարձել է Ղարաբաղյան հակամարտության կարգավորման հեռանկարներին: Ադրբեջանն ու Հայաստանը դժվար թե այս տարի կարողանան համաձայնության գալ Լեռնային Ղարաբաղի տարածքի վիճելի հարցում, և տարածաշրջանում նոր պատերազմի բռնկման ռիսկ կա. ասել է վարչապետը, փոխանցում է գործակալությունը:

Reuters-ը նշում է, որ հակամարտող կողմերի միջև զինադադարը հաստատվել է 1994-ին, երբ արդեն 30.000 մարդ էր սպանվել, սակայն զինադարարը հայ-ադրբեջանական զորքերի շփման կրակագծում ժամանակ առ ժամանակ բազմիցս խախտվում է:

Օտարերկրյա կառավարությունները զգուշանում են Հարավային Կովկասում պատերազմի բռնկման հնարավորությունից, քանի որ այն սպառնում է դեպի Եվրոպա տանող գազատար և նավթատար խողովակաշարերին, որոնցից ռազմավարական շահ ունեն Իրանը, Ռուսաստանն ու Թուրքիան:

«Եթե մեզ հաջողվի տարին խաղաղությամբ ավարտել, դա, անշուշտ, ամենակառուցողական քայլը կլինի, սակայն ես լավատեսորեն չեմ տրամադրված այս տարվա ընթացքում հակամարտության՝ խաղաղ ճանապարհով լուծման հնարավորության հարցում»,-ասել է Փարիզում ֆրանս-հայկական գործարարների հետ հանդիպման մեկնած ԼՂՀ վարչապետ Արայիկ Հարությունյանը:

Reuters-ը նշում է, որ 160.000 բնակչություն ունեցող այդ անկլավը գործում է Հայաստանի ռազմական և ֆինանսական աջակցությամբ: Հայաստանը անվտանգությունն ապահովում է Ռուսաստանի, իսկ Ադրբեջանը՝ Թուրքիայի հետ գործարքների աջակցությամբ:
Նավթարդյունահանող Ադրբեջանը հաճախ է սպառնում տարածքը հետ խլել պատերազմով, չնայած այն բանին, որ հայտարարում է, թե պատրաստ է խաղաղ բանակցությունների միջոցով դիվանագիտական լուծում գտնել:

«Ո՛չ Ադրբեջանը, ո՛չ Ղարաբաղը չի շահի նոր բռնկվող պատերազմից, քանի որ, կարծում եմ, ոչ մի երկիր չի կարող ասել, թե միանշանակ կհաղթի պատերազմը։ Սակայն ես չեմ բացառում այդ հնարավորությունը»,-ասել է Հարությունյանը և նշել, որ Ղարաբաղը երբեք առաջինը չի հարձակվի:

«Ես կարծում եմ, որ նոր պատերազմը կհանգեցնի արյունալի կորուստների և հումանիտար ճգնաժամի, քանի որ զոհերի քանակն ավելի շատ կլինի, քան նախորդ պատերազմի ընթացում: Ադրբեջանն ու Հայաստանն այս ընթացքում նոր տեսակի սպառազինություններ են ձեռք բերել, ինչը կբերի անհամեմատ մեծ քանակով մարդկային կորուստների»,-ասել է ԼՂՀ վարչապետը: