Արձագանքներից ամենախայտառակը՝ Դատական դեպարտամենտից, իսկ օրինակելին՝ ոստիկանապետից

«Մեր երկրում ամենամեծ չարիքն արդարադատության և հացի պակասն է: Մեր ժողովրդին պակասում են հաց և արդարություն: Թե որքանով են քաղաքականացնում օմբուդսմենի զեկույցները, դա արդեն մեր խնդիրը չէ»: Այս մասին այսօր լրագրողների հետ հանդիպմանն ասաց ՄԻ պաշտպան Կարեն Անդրեասյանը՝ ամփոփելով ՄԻՊ-ի 2012թ. տարեկան զեկուցները:

Վերջինիս խոսքով՝ տարեկան զեկույցը 136 էջ է, վերաբերում է 22 պետական գերատեսչության գործունեության և 148 համակարգային խնդրի, որոնք ազդում են շարքային քաղաքացիներից մինչև ամենաբարձր պաշտոնյաների վրա:

Կարեն Անդրեասյանը կարծում է, որ ամենադժվար խնդիրներ ունեցող ոլորտներից մեկը ոստիկանությունն է, սակայն ոստիկանապետ Վլադիմիր Գասպարյանի արձագանքը զեկույցին օրինակելի էր:

Նշենք, որ ոստիկանապետը հայտարարել էր, որ իրենք ՄԻՊ-ի արձանագրած թերություններից ավելին են տեսնում: Ամենախայտառակ, ամենացավալի արձագանքը Կարեն Անդրեասյանը համարեց Դատական դեպարտամենտի արձագանքը:

«Նրանք իրենց արձագանքով հուսահատեցնում են ՄԻՊ-ին և հասարակությանը: Նրանք մոռանում են, որ վերջին հարցման արդյունքներով հասարակության 70%-ը վստահություն չի ունեցել դատական համակարգի նկատմամբ: Վատ արձագանքների շարքում պետք է ընդգծեմ Արդարադատության նախարարությունը»,-ասաց Կարեն Անդրեասյանը:

Օմբուդսմենը նաև նկատում է, որ այսօր առաջընթաց կա՝ և´ իրավունքների պաշտպանության հարցում, և´ գերատեսչությունների արձագանքների առումով:

Ինչ վերաբերում է նախագահական ընտրություններին, պաշտպանը տեղեկացրեց, որ ապրիլի 2-ին Գյումրիում կհրապարակվի արտահերթ հատուկ զեկույցը, որտեղ էլ կանդրադառնան մարդու իրավունքների խախտումների մասին՝ կապված նախագահական ընտրությունների հետ: