Էդվարդ Նալբանդյանը պաշտոնանկ կարվի՞. մամլո խոսնակը բարկացած է

«ՀՀ արտաքին գործերի նախարար Էդվարդ Նալբանդյանի պաշտոնանկության մասին լուրը բուռն քննարկվում է Արտգործնախարարությունում: Ըստ խոսակցությունների՝ Էդ. Նալբանդյանը նշանակվելու է Շվեյցարիայում ՀՀ արտակարգ և լիազոր դեսպան:

Հիշեցնենք, որ ֆրանսահայ երգիչ Շառլ Ազնավուրը 2009 թվականից Շվեյցարիայում ՀՀ արտակարգ և լիազոր դեսպանն է: Ըստ նույն աղբյուրների՝ ՀՀ արտագործնախարար է նշանակվելու ՀՀ նախագահի աշխատակազմի ղեկավար Վիգեն Սարգսյանը: Արտգործնախարարության աղբյուրները նշում են, որ Վիգեն Սարգսյանը վաղուց էր երազում այդ պաշտոնում նշանակվելու մասին»,-այս մասին գրում է 168.am-ը:

Lurer.com-ի թղթակիցը կապ հաստատեց ԱԳՆ մամլո խոսնակ Տիգրան Բալայանի հետ՝ ճշտելու, թե ինչքանով է տարածված տեղեկատվությունը համապատասխանում իրականությանը, սակայն հերքելու կամ հաստատելու փոխարեն՝ մամլո խոսնակը ցանկացավ տարբերվել մնացածից. «Ես անհեթեթ բամբասանքներին և ոչ կոռեկտ հարցերին չեմ պատասխանում»:

Լրագրողը նույն հարցը նաև այլ կերպ ձևակերպեց, որպեսզի հանկարծ չվիրավորի շատ «նրբանկատ» մամլո խոսնակին։ Վերջինիս զայրույթը կրկնապատկվեց. «Ես չորրորդ անգամ եմ ասում՝ ոչ կոռեկտ հարցերին չեմ պատասխանում»:

Պրակտիկայում ընդունելի տարբերակ է՝ լրագրողը տարածված տեղեկությունները ճշտում է մամուլի պատասխանատուներից և հավաստի ինֆորմացիա է տարածում: Այս անգամ խոսնակը բարկացավ, ըստ էության, ո՛չ հերքելով, ո՛չ փաստելով նախարարի պաշտոնանկության մասին լուրերը: