«Սարգսյանը կարող է երդվել միայն իմ դիակի վրա». Րաֆֆին նկատի ուներ քաղաքական դիակ հասկացությո՞ւնը

«Ժողովուրդը» խմբագրականում գրում է.

«Եվ այսպես՝ «ոչ մի զադնի» կարգախոսով փետրվարի 20-ից Ազատության հրապարակում հանրահավաքներ անող եւ վերջին քսան օրերին հացադուլի մեջ գտնվողՐաֆֆի Հովհաննիսյանը երեկ հայտարարեց, որ մարտի 31-ին կդադարեցնի հացադուլը, իսկ արդեն ապրիլի 1-ից մինչեւ 5-ը կշրջի Հայաստանի մարզերում: Րաֆֆու այս որոշումը շատերի համար անսպասելի էր, քանի որ նա մինչ այդ (ընդ որում՝ ոչ մեկ անգամ) հայտարարել էր, թե չի դադարեցնի հացադուլը եւ չի լքի Ազատության հրապարակը, քանի դեռ Սերժ Սարգսյանն ինքնաբացարկ
չի հայտարարել:

Սակայն, ինչպես տեսանք, Րաֆֆի Հովհաննիսյանը հավատարիմ մնաց ինքն իրեն՝ հերթական անգամ հաստատելով, որ հակասական եւ անկանխատեսելի գործիչ է, որի եւ ոչ մի հայտարարություն չի կարելի դիտարկել որպես անվերապահ եւ անշրջելի դիրքորոշում: Հատկապես Սերժ Սարգսյանի վերջին նամակից հետո, որտեղ նա կոչ էր արել Ր. Հովհաննիսյանին դադարեցնել հացադուլը եւ մեկ-երկու օր կազդուրվելուց հետո առանց շոուների նստել քննարկման սեղանի շուրջ, ինչին Հովհաննիսյանը պատասխանել էր հացադուլը չդադարեցնելու եւ բացառապես Ազատության հրապարակում հանդիպելու անդրդվելի վճռականությամբ, երեկվա նրա որոշումը, մեղմ ասած, տարակուսելի է եւ, ցավոք, ամենատարբեր մեկնաբանությունների տեղիք տվող: Բնականաբար՝ Րաֆֆու կողմնակիցները կփորձեն հացադուլի դադարեցումը ներկայացնել որպես մարտավարական հնարք:

Հավանաբար հենց այդ նպատակով երեկ արվեց Սյունիքի մարզպետ Սուրեն Խաչատրյանին «գլուխ ջարդելու» շուրջ հրապարակային ՙ«ռազբորկայի» հրավերքը՝ դրանով փորձելով ապահովել «թամաշան», որպեսզի ժողովուրդը թեկուզ մի կարճ ժամանակ չհարցնի, թե ինչու
Րաֆֆին «զադնի դրեց»:

Բայց դա, իհարկե, շատ կարճ ազդեցություն կունենա (եթե այս ընթացքում չլինեն հանրության ուշադրությունը հիմնական հարցից շեղող սադ-
րանքներ): Ու թեեւ «Ժառանգության» առաջնորդը երեկ հայտարարեց, թե այդ մարզային շրջայցը, ապա Ազատության հրապարակում կայանալիք հերթական «հաղթական» հանրահավաքը միտված են ապրիլի 9-ի երդմնակալությանը վերաբերող միջոցառումների նախապատրաստությանը, ակնհայտ է, որ երդմնակալության հետ կապված ընդդիմության հիմնական քաղաքական միջոցառումն արդեն իսկ տապալված է. Րաֆֆի Հովհաննիսյանը հայտարարել էր, որ Սերժ Սարգսյանն այդ օրը կարող է երդվել միայն իր դիակի վրայով: Մինչդեռ
հացադուլը դադարեցնելուց հետո դիակի թեման դուրս է գալիս օրակարգից: Եթե իհարկե, Րաֆֆի Հովհաննիսյանը նկատի չէր ունեցել քաղաքական դիակ հասկացությունը:

Հ.Գ. Երեկվա հանրահավաքի ավարտին Րաֆֆի Հովհաննիսյանն իր համախոհների հետ պարել է Ազատության հրապարակում:
Հիշեցնենք, որ 2008թ. մարտի 1-ի նախօրեին Ազատության հրապարակում իր վերջին պարը պարեց նաեւ Լեւոն Տեր-Պետրոսյանը»: