ԲՀԿ-ն՝ ՀՀԿ կոմայից դուրս գալու ճանապարհին

Վաղուց է, ինչ Հայաստանում նախագահական պայքարի տեսակը թևակոխել է մի նոր փուլ ու աստիճանաբար իր տեղը զիջել է Երևանի ավագանու ընտրություններին, որը թերևս այս օրերին արդեն իսկ դարձել է շատ շատերի խոսակցության թեման՝ չնայած նախագահի՝ իր ունեցած կենցաղայնությանը:

Սակայն բանից պարզվում է, որ այն լավ էլ քաղաքականացված է, ավելին, բոլորը (իհարկե, խոսքը քաղաքական ուժերի մասին է) սկսել են ապրել ու արարել բառի ամենաուղիղ իմաստով՝ նախապատրաստվելով այդ ընտրություններին։ Այս պարագայում խոսքը մասնավորապես Երևանի գործող քաղաքապետ Տարոն Մարգարյանի մասին է, ով կարծես այս վերջին շրջանում վերածվել է սուպեր-պուպեր հեռուստաաստղի, ով հեռուստաէկրաններից ներքև չի իջնում, նամանավանդ՝ իշխանամետ հեռուստաալիքների եթերից: Կարծես ՀՀԿ-ում շփոթել են քարոզարշավի մեկնարկի օրը և կարգախոսը հաստատելուց հետո անմիջապես սկսել են կարգախոսի տակից դուրս գալու ու սեփական նախագծերի գերակատարման աշխատանքները:

«Ավելի լավ Երևան». համեմատության այս բաղդատական աստիճանով, իհարկե, դեռ հաղթանակի հույսեր փայփայելը կլինի ուղղակի անհեռատեսություն, այդ իսկ պատճառով էլ արդեն ՀՀԿ-ն ֆունդամենտ է գցում,  մոտ 400 նախընտրական շտաբ, այն դեպքում, որ դեռ ընտրություններին ևս մեկ ամիս կա, այսինքն՝ այս ընթացքում այս աճը կարող է մեծանալ երկրաչափական պրոգրեսիայով՝ արդեն ապրիլի կեսերին հասնելով կես միլիոնի կամ էլ ավելի շատի, չնայած որ, ըստ օրենսդրության, սահմանված կարգը նախատեսում է 450 նախընտրական շտաբ և ոչ ավելի, բայց դե, չի էլ կարելի մոռանալ, որ Հայաստանում ձևավորվել է նոր կուլտուրա քանակի առումով՝ «ինչքան ուզենք կխփենք»:

Սակայն, ըստ երևույթին, խփելու առումով բավականին մեծ հնարավորություններ ունեն նաև ԲՀԿ-ականները, ովքեր պատրաստվում են «սկսել Երևանից» և «փոխել», ամենայն հավանականությամբ, Երևանում առկա այս «գաղջ» մթնոլորտը, որը, անկասկած, ըստ այս տրամաբանության՝ ՀՀԿ-ի՝ Երևանը ղեկավարելու արդյունք է: Չնայած նրան, որ հենց նույն ԲՀԿ-ն, ժամանակին լինելով Երևանի ավագանու կազմում, չգիտես ինչու, փոփոխության մտադրություն կարծես չուներ էլ, սակայն ժամանակները փոխվում են, քաղաքական կատիգորիաները՝ նույնպես։ Ստացվել է այնպես, որ առաջ ամեն ինչ լավ էր, հիմա ամեն ինչ վատ է՝ դատելով ԲՀԿ-ի և ՀՀԿ-ի գզվռտոցից, որը, կարծես, դարձել է տոնական զարդ քաղաքական պրոցեսների համար: Այդուհանդերձ, ԲՀԿ-ն, ըստ շրջանառվող լուրերի, պատրաստվում է Երևանում 200 նախընտրական շտաբ ստեղծել, որը, սակայն, նույնպես քիչ չէ, սակայն համեմատական կարգով հաղթանակի նվազեցման խթան հանդիսացող է, անշուշտ: ԲՀԿ-ն՝ ի դեմս Վարդան Օսկանյանի, նույնպես սկսել է քարոզարշավը, մասնավորապես՝ Վարդան Օսկանյանի ֆեյբուքյան էջում, որտեղ օրերս, ի տարբերություն իշխանությունների, ովքեր ամեն կերպ այս ընտրությունները կենցաղային մակարդակի են իջեցնում, Օսկանյանը շեշտել ու այնուհետև հիմնավորել է ընտրությունների՝ քաղաքականացված լինելու փաստը:
Այս անգամ ԲՀԿ-ն կարծես վերջապես փորձում է դուրս գալ ՀՀԿ կոմայից, որում արդեն երկար տարիներ է, ինչ հայտնվել է. այս անգամ արդեն ԲՀԿ-ն 2008-ի նման ՀՀԿ կոալիցիոն համախոհը չէ, և ուրեմն Վարդան Օսկանյանի գլխավոր նպատակը նախորդ տարիների ավագանու ընտրություններում պարտությունների դառը փորձը չկրկնելն է, նաև՝ ԲՀԿ խմբակցության պարտությունների մասով:

Այլապես ամեն անգամ ԲՀԿ-ն հռչակում է նպատակների մի ցուցակ՝ արդյունքում դառնալով դրանց գերին և անգամ ստորին նշաձողին չկարողանալով հասնել՝ սահմանափակվում է իրեն ընձեռված՝ Գագիկ Ծառուկյանի անվան շուրջ ստեղծված բարեգործի վարկանիշով, սակայն որի ժամկետը նունպես կարող է լրանալ, եթե այն բարձրացնելու ուղղակի քայլեր չարվեն հենց Երևանի ավագանու ընտրությունների ժամանակ, այլապես հերթական անգամ կտրվի ինքնալիկվիդացման սկիզբը, որը, ի վերջո, Ուրիխանյանի՝ ՀՀԿ-ին ուղղված փուչիկ փչողների դարձվածքն իրականության կվերածի սեփական կուսակցության համար, եթե, իհարկե, արդեն իսկ չի վերածել:

Գևորգ Ավետիսյան