Լիլիթ Հայրապետյան՝ 45 ժամ անդադար պարողը

Հազվադեպ է պատահում, որ բեմի մարդը, առավել ևս՝ պարողը, ոչ թե փոքրուց է ընտրում արվեստի իր ոլորտը, այլ 12 տարեկանում: Նման օրինակ ունեցել է պարի հիփ-հոփ ճյուղը նախընտրող, դրանով ապրող Լիլիթ Հայրապետյանը, ով այժմ 17 տարեկան է և այս տարիների ընթացքում հասցրել է մի շարք մրցույթների հաղթող ճանաչվել: Օրեր առաջ էլ նա հաղթանակած վերադարձել է Վրաստանից, որտեղ մասնակցել է Կովկասյան երկրների օլիմպիադային:

Լիլիթի պարային կարիերան սկսվել է 12 տարեկանից, երբ որոշել է դեմ գնալ ծնողների ցանկությանը, պարել ու իր հաղթանակներով ապացուցել, որ պետք է լինի բեմում: Սկզբնական շրջանում նա ընտրել էր լատինամերիկյան ոճը, սակայն հասկացել է, որ իրենը հիփ-հոփն է:

Առաջին ու ամենատպավորիչ մրցույթը Լիլիթի կյանքում եղել է 2011-ին, երբ մասնակցել է Հայաստանում առաջին անգամ անցկացվող «Դիսկո պարողը» մրցույթին, որտեղ հաղթող էր ճանաչվելու այն մասնակիցը, ով առանց դադարի ամենաշատը կպարեր: Եվ ահա Լիլիթն անդադար պարել է շուրջ 45 ժամ: Նշենք նաև, որ մրցույթի ընթացքում թույլատրվում էր պարելով սնվել, իսկ չորս ժամվա ընթացքում նրանք ունենում էին հինգ րոպե ընդմիջում: Այն ժամանակ 15-ամյա Լիլիթը՝ լինելով երիտասարդ ու աշխույժ մարդ, կարողացել է 45 ժամ անդադար պարել, հաղթանակ տանել և արժանանալ Դուբայի երկու ուղեգրի: Սրան հաջորդել է Հայաստանի օլիմպիադային մասնակցելը, որի ժամանակ Լիլիթը գրավել է առաջին տեղը:

Այս մրցույթներում հաղթելն ու ծնողների հավանությունը ստանալուց հետո Լիլիթը շարունակել է մասնակցել այլ մրցույթների ու մեծ քայլերով առաջ գնալ: Պարային հաջորդ «կանգառը» եղել է 2012-ին, երբ Լիլիթը Հայաստանում մասնակցել է «Street dance» մրցույթին ու կրկին արժանացել առաջին մրցանակին:

Միջազգային բեմերում ևս նա պարել է և, ինչպես ինքն է նշում, պարն իր համար շատ մեծ նշանակություն ունի, առանց որի չի կարող ապրել. նույնիսկ հայրիկին ջուր տանելը նա պարելով է անում:)

2012-ին Լիլիթը մասնակցել է զուգահեռաբար ընթացող Ռուսաստանի օլիմպիադային (200 մասնակցից նա գրավել է 5-րդ տեղը) և Աշխարհի 9-րդ պարային օլիմպիադային (75 մասնակցից՝ 10-րդ տեղը):

Լիլիթը, ով այժմ պարապում է դասական պար ու պատրաստվում է ընդունվել Թատերական ինստիտուտի Պարարվեստի ռեժիսուրայի ֆակուլտետը, վերջերս էլ հաղթանակած է վերադարձել Վրաստանից, որտեղ մասնակցել է Կովկասյան երկրների օլիմպիադային: Օրեր առաջ՝ մարտի 23-ին, տեղի ունեցած օլիմպիադայից Լիլիթը վերադարձել է միանգամից երեք մրցանակով՝ գրավելով «Առաջին տեղը», համարվելով «Կովկասի լավագույն պարուհի» և «Օլիմպիադայի հաղթող»:

Լիլիթն այժմ հիփ-հոփն անհատական է պարապում և համագործակցում է «Կատարողական արվեստի համահայկական ասոցիացիայի» նախագահ Արտաշես Մեսրոպյան հետ, ով մշտապես աջակցում է նրան, տվյալներն է ստուգում ու նաև առաջարկում է այս կամ այն մրցույթին մասնակցել:

Իր երազանքների մասին խոսելիս պատանի պարուհին նշեց, որ ուզում է Ամերիկյան ուսումնական հաստատություններից մեկում սովորել հիփ-հոփ, լինել առաջատար պարուհի, ամբողջ աշխարհով շրջել ու հայկական դրոշը միշտ բարձր պահել:

{gallery}1144{/gallery}