Ապրիլի 9-ին իմ կյանքի գնով ունենալու ենք ազգային միասնութուն. Րաֆֆի Հովհաննիսյանը՝ Սիսիանում

Այսօր՝ ապրիլի 1-ի, Րաֆֆի Հովհաննիսյանն իր համակիրների հետ եղավ նաև Սիսիանում։

Սիսիանցիների հետ հանդիպման ժամանակ Րաֆֆի Հովհաննիսյանը հարցրեց հավաքվածներին՝ արդյոք իրենք պատրաստ են մինչև հաղթանակ լինել իր կողքին, որին ի պատասխան՝ սիսիանցիները ծափահարեցին ու գոռացին ՝«Այո՛»։

Վերջինս իր զորակցությունը հայտնեց հավաքվածներին՝ փոխանցելով «Ժառանգության» գրասենյակի հեռախոսահամարները, որպեսզի քաղաքացիները յուրաքանչյուր խնդրի դեպքում կարողանան կապ հաստատել իրենց հետ։

«Պարզապես եկա այսօր ձեզ բարև ասելու, շնորհակալություն հայտնելու, որ զորակցել եք, ուժ եք տվել։ Ապրիլի 9-ին, ուզենք, թե չուզենք, իմ կյանքի գնով ունենալու ենք ազգային միասնութուն։ Փրկիչների, կուսակցապետերի, կեղծ հայրենասերների ժամն անցել է»,-ասաց Րաֆֆի Հովհաննիսյանը։

Վերջինս, անդրադառնալով ապրիլի 9-ին Ազատության հրապարակում կազմակերպվելիք հանրահավաքին, կոչ արեց սիսիանցիներին գալ ու մասնակցել հանրահավաքին, չնստել տանը և սերիալի նման հետևել զարգացումներին։

«Ճանապարհներն ով փակեց, Ձեզ հետ և ինձ հետ գործ պետք է ունենա։ Չէի ուզենա՝ ապրիլի 9-ին տանը նստեիք, ամեն մեկս իր բաժին պայքարը պետք է ստանձնի։ Գործող իշխանությունները մեկ-մեկ չարաճճի բաներ են ասում, Արցախը սպեկուլացիայի են ենթարկում։ Ազատության հրապարակը, հայ ժողովրդի  հաղթանակը Արցախի դեմ չէ, մեր սահմանային ապահովությունը էժան հռետորաբանության չենք ենթարկելու։ Ոչ մեկը թող բանակը չխառնի քաղաքացիական զարթոնքի մեջ, եկեղեցին թող անջատ լինի։ Ապրիլի 9-ին սուտ երդում, անհիմն ու կեղծ օրհնություն չտաք»,-ասաց Րաֆֆի Հովհաննիսյանը