Միայնակ սեփական ծնունդին

Ապրիլի 1-ն ընդանրապես մեր հասարակությունում ընդունված է նշել որպես Հումորի օր, սակայն այս օրը բոլորն էլ, ինչպես ամեն ինչը Հայաստանում, ծառայեցնում են իրենց նպատակների իրականացմանը՝ խաբելուն, սակայն սա այս օրերին միակ տոնը չի լինի հանրապետականների համար, ովքեր ապրիլի 2-ին՝ այսօր, կնշեն իրենց կուսակցության ծնունդը՝ 23-ամյակը: Այո, 1990 թվականի հենց այս օրն է ստեղծվել ՀՀԿ-ն:

Հետաքրքրականն այն է, որ որպես այդպիսին՝ լուրջ, մեծ միջոցառումներ այդ կապակցությամբ չեն իրականացվում՝ սահմանափակվելով ընդամենը փոքր հավաքույթով, համենայն դեպս, նախորդ տարի հենց այդպես էլ ՀՀԿ-ում վարվել են:

Այս տարի արդեն իրավիճակը բավականին զգայուն է, մի կողմից՝ մեծ միջոցառումը կարող է նպաստել կուսակցության՝ նախագահական ընտրություններից հետո ընկած վարկանշի բարձրացմանը, այսինքն՝ այդ կերպ ևս Սերժ Սարգսյանը հնարավորություն կունենա հանրությանը ցուցադրել հանրապետականների աննկուն ոգին և հաղթողի կարգավիճակը, մյուս կողմից՝ նույն այդ միջոցառումը բավականին ռիսկային կարող է ընկալվել հասարակությունում, այսինքն՝ մինչև երդմնակալության արարողություն այդպիսի մեծ միջոցառումը կարող է առիթ տալ հերթական խոսակցություններին այն մասին, որ Սերժ Սարգսյանը, կարևորագույն հարցերը դեռ չլուծած, զբաղվում է քեֆերի ու ծնունդների կազմակերպմամբ, որն էլ իր հերթին կարող է ոչ միանշանակ արձագանք գտնել նույն Րաֆֆի Հովհաննիսյանի պայքարում ու նոր ընդվզման պատճառ դառնալ:

Այս տարի արդեն ամեն ինչ այն չէ, ինչ նախորդ տարի։ Չնայած նրան, որ նախորդ տարի ոչ մի կուսակցություն գոնե պաշտոնապես չէր շնորհավորել հանրապետական կուսակցության նախագահին կամ փոխնախագահին, այնուամենայնիվ, այս տարի արդեն այն մարդիկ, ովքեր նախորդ տարի շնորհավորել էին գոնե ոչ պաշտոնական ձևով, այս անգամ արդեն այդ կերպ էլ չեն շնորհավորի կուսակցությանը:

Համենայն դեպս ու մասնավորապես, այսօր ԲՀԿ-ն այն չէ, ինչ առաջ էր, և սպասել մի կուսակցությունից շնորհավորանքներ, որն անգամ վերընտրվելու կապակցությամբ չի շնորհավորել ՀՀԿ կուսակցության նախագահ Սերժ Սարգսյանին, կլինի ուղղակի անհեռատեսություն, և այն շահադիտական շնորհավորանքները, որոնք կարող էին ձոնվել, այլևս բացառվում են: ՀՅԴ, ՀԱԿ, «Ժառանգություն». այս կուսակցությունները ևս այս իրավիճակում միանշանակ շնորհավորական ոչ մի ուղերձ որպես այդպիսին չեն հղի հանրապետականներին՝ ելնելով առաջիկայում սպասվելիք Երևանի ավագանու ընտրություններում որպես մրցակիցներ հանդես գալու տրամաբանությունից, և բացի այդ, նմանատիպ շնորհավորանքներն ուղղակի այս կուսակցությունների կողմից կարող են միանշանակ չընդունվել հենց սեփական կուսակցականների կողմից:

Եվ վերջապես, Արթուր Բաղդասարյան և ՕԵԿ, չնայած նրան, որ նախորդ տարի այս կուսակցությունն ուղղակի մոռացել էր կոալիցիոն գործընկերոջ՝ ՀՀԿ-ի ծննդյան օրը և օգտվելով լրատվամիջոցի զանգից՝ միայն շնորհավորեց հոգեհարազատ կուսակցությանը տարեդարձի առթիվ, միևնույն է, այս տարի նույնպես ՕԵԿ-ից չսպասել նմանօրինակ երևույթ ուղղակի անկարելի կլինի. հավանական է, որ նախորդ տարվա դեպքը դարձած լինի դաս այս տարվա համար:

Եվ այսպիսով՝ Հայաստանի հանրապետական կուսակցությունը հերթական անգամ սեփական ծննդյան տարեդարձը դատապարտված է նշել միայն նեղ շրջապատում՝ ձևի համար և անսիրտ, քանի որ չնայած վստահությանը և իրադարձությունների՝ լավ դասավորվելուն, այնուամենայնիվ, ռիսկայնություն ապրիլի հետ կապված, թեկուզ աննշան, սակայն կա, որն էլ կստիպի կուսակցության նախագահին և մնացած անդամներին տոնը դարձնել տոն, որը միշտ իրենց հետ է:

Գևորգ Ավետիսյան