Պռոշյանի գյուղապետի սպանությունը` քաղաքական հետապնդո՞ւմ

Ինչպես արդեն տեղեկացրել էինք այսօր Կոտայքի մարզի Պռոշյան գյուղի գյուղապետարանի դիմաց հայտնաբերվել է նույն գյուղի գյուղապետ, 1963թ. ծնված Հրաչ Մուրադյանի դիակը: Օպերատիվ-քննչական խումբը պարզել է, որ Հրաչ Մուրադյանը մահացել է աջ քունքի շրջանում անհայտ անձի կողմից արձակած հրազենային վնասվածքից:

Lurer.com-ի թղթակիցը ՀՅԴ ԳՄ փոխներկայացուցիչ Արսեն Համբարձումյանից փորձեց մեկնաբանություն ստանալ` ինչքանով այն կարող է քաղաքական հետապնդում լինել ՀՅԴ-ական գյուղապետ Հրաչ Մուրադյանի նկատմամբ: Վերջինս ասաց, որ այդ առթիվ ՀՅԴ-ն պատրաստվում է հայտարարություն տարածել:

Նշենք, որ մեր հարցն առաջացել էր քանի որ Հրաչ Մուրադյանը երրորդ անգամ վերընտրվել է գյուղապետ և հակասություններ է ունեցել ՀՀԿ-ական մրցակիցների հետ:

«Առաջին լրատվական»-ի հետ զրույցում նույն գյուղի բնակիչները պատմել են, որ նա անչափ մարդկային էր, չի մերժել գյուղացիների որևէ խնդրանք և երրորդ անգամ վերընտրվել է գյուղապետ: Թեև երկու ընտրություններին ունեցել է ՀՀԿ մրցակիցներ, սակայն գյուղում լինելով ընդունված մարդ` նա է կրկին վերընտրվել:

Գյուղացիները պատմում էին, որ նա շատ ինքնուրույն համայնքապետ է եղել և չի ընկրկել տեղական չինովնիկների ճնշումներից: Հավաքված մարդիկ ասում էին, որ Կոտայքի մարզում նա այն եզակի գյուղապետերից էր, որը որոշ հարցերում դեմ է դուրս եկել Կոտայքի ՀՀԿ-ական մարզպետ Կովալենկո Շահգալդյանին: Նա այդ առումով որոշ խնդիրներ է ունեցել նաև մարզպետի հետ: Ակնարկում էին, որ Հրաչ Մուրադյանին գյուղապետի ընտրություններում երբեմն փորձել է խանգարել նաև նրա ՀՀԿ-ական մրցակից Արթուր Մուրադյանը: Նաև ասում էին, որ նա ընտրությունների ժամանակ իր գյուղացիներին չի ստիպել կամ հորդորել ընտրել իշխանության թեկնածուին:

Գյուղացիների պատմելով` տեղական իշխանություններին դուր չի եկել, որ Հրաչ Մուրադյանը կարողացել է ինքնուրույն ֆինանսավորում գտնել և վերանորոգել գյուղի դպրոցն ու մանկապարտեզը, որոշ ճանապարհներ: Դա նա կազմակերպել է սփյուռքահայ իր ընկերների օգնությամբ