Վերջին 6 տարվա «ամենաները»

Քեզ արդեն ներկայացրեցինք մեզ հետ ծնվածներին, այժմ տեսնենք, թե անցնող 6 տարում ովքեր են ամենաշատ ձեռքբերումներն ունեցել և առաջատարներ եղել այս կամ այն անվանակարգում: Մենք նրանց մրցանակներ չենք տալու, բայց խրախուսում ենք 6 տարի անընդմեջ ակտիվությունն ու հորդորում շարունակել աշխատել նույն ջանասիրությամբ :)

Ամենաշատ մրցանակները ստացել է Արամեն: 2006-ից ի վեր երգչի ստացած մրցանակների ընդհանուր թիվը 50-ից ավելի է: Մեր շոու-բիզնեսում մեզանից՝ «Ե՞ս Yes!»-ից մեկ տարով մեծ (նկատի ունենք ստեղծագործական կարիերայի տարիքը-հեղ.) երգիչն իր առաջին տեսահոլովակը հայ հանդիսատեսին ներկայացրեց 2005-ին: Այն արժանացավ հանդիսատեսի սիրուն, ու Արամեն հաստատուն քայլերով սկսեց առաջ գնալ այս ասպարեզում:

Ի դեպ, հավելենք, որ անցնող 6 տարում 30-ից ավելի մրցանակ ստացել է Սիրուշոն, 20-ից ավելի՝ Էմմին:

Այս ընթացքում հայկական շոու-բիզնեսում ամենաշատ ձայնասկավառակը թողարկել է Սերժօն: Նա ունի 6 ալբոմ՝ «Տժվժիկ», «Reverse», «Սինգլներ և ռեմիքսներ», «4-րդ ռեյխ», «Insomnia» և «HayTok vol.1»: Վերջինը թողարկեց իր նախաձեռնած «HayTok» նախագծի շրջանակներում, որը հայ DJ-ների ստեղծագործությունների հավաքածու էր: Այս ընթացքում Սերժօն ներկայացրեց նաև մեկ սինգլ՝ «P.O.N.T»: Մինչև գարնան վերջ նա պատրաստվում է թողարկել «HayTok vol.2»-ը, որը կլինի նրա 7-րդ սկավառակը 6 տարվա ընթացքում:

Ամենաշատ տեսահոլովակներ նկարահանել են Արամեն և Ռազմիկ Ամյանը: Արամեի տեսահոլովակների ընդհանուր թիվը 22 է, իսկ Ռազմիկը նրան զիջել է միայն 1 տեսահոլովակով՝ իր հանդիսատեսին ներկայանալով 21-ով: Նրանց գրեթե բոլոր երգերը հիթ են դարձել, տեսահոլովակներն էլ գլխավորել են լավագույն տասնյակները կամ գտնվել առաջատար հորիզոնականներում:

Դեռ մի քանի տարի առաջ հայկական ֆուտբոլի մասին խոսելը հումորային ակումբների առանցքային թեման էր: Վերջին տարիներին, սակայն, այս ոլորտում աննախադեպ առաջընթաց ունեցանք, ինչը պայմանավորված էր ինչպես հայ ֆուտբոլիստների որակական աճով, այնպես էլ մեր ազգային հավաքականում արտասահմանցիների ներգրավելով: Ներկայիս տվյալներով՝ Հայաստանի ազգային հավաքականի հանդիպումների ընթացքում ամենաշատ գոլը խփել է Մարկոս Պինեյրո Պիզելին՝. 86: Ընդ որում՝ նա դրանցից միայն 2-ն է ընկերական հանդիպման ժամանակ խփել: Մարկոսն ունեցել է 3 զգուշացում, բայց ոչ մի անգամ չի հեռացվել խաղից: Ֆուտբոլիստը բրազիլացի է, ով հանդես է գալիս «Փյունիկ» ակումբում և ունի մեր երկրի քաղաքացիություն:

Այս ընթացքում լրատվամիջոցների ուշադրության կենտրոնում հաճախ հայտնված հայտնին Սիրուշոն է. հյուրընկալվելով տարբեր հեռուստածրագրերի, հայտնվելով ամսագրերի շապիկներին և մնալով ինտերնետային լրատվամիջոցների թոփ 5-ում՝ Սիրուշոն առաջատար դիրքերում է: Անցնող 6 տարիներին երգչուհին էլ ավելի ամրապնդեց իր դիրքերը մեր շոու-բիզնեսում. չնայած ընտանիք կազմելուն՝ երգչուհին չկորցրեց իր երկրպագուների բանակը, արտասահմանյան հաջող ելույթներ ու զուգերգեր ունեցավ՝ հայտնվելով դեռևս մեր հայտնիներից շատերի համար անգերազանցելի բարձունքում:

Հ.Գ. Երգիչ-երգչուհիների մրցանակների և տեսահոլովակների թիվը հաշվարկել ենք ըստ իրենց տրամադրած տվյալների:

«Ե՞ս Yes!» ամսագիր, արխիվ