Մայրության բերկրանքը «վարակել էր» հայ մանեքենուհիներին

Եթե հայտնի ես, ճանաչված ու հաջողակ, եթե մասնակցում ես գեղեցկության մրցույթների, զբաղվում մոդելային կարիերայով, լուսանկարվում անկեղծ ու համարձակ կեցվածքներով, ապա ընտանիք, երեխա ասվածը քեզ համար չէ: Սա անհեթեթ կարծրատիպ է, որով մտածելն ու առաջնորդվելը բնորոշ է շատերիս:

Նախկին մանեքենուհի Քրիստինե Սմսարյանն իր ամուսնու՝ Արմեն Պետրոսյանի՝ Մենչի հետ ծանոթացել է 2002թ.՝ ինչ-որ նկարահանման ժամանակ: 7 ամսվա ծանոթությունից հետո 18 տարեկան Քրիստինեն ընտանիք կազմեց, ինչպես ասում են՝ խաչ քաշելով մոդելային կարիերայի վրա: 2003-ի հուլիսի 21-ին ծնվեց Մենչի և Քրիստինեի առաջնեկը՝ Էլինան: Ապա մի քանի տարի անց՝ 2008-ի մայիսի 6-ին ծնվեցին նրանց զույգ բալիկները՝ Աշոտը և Մարիան: Այնպես որ, բազմազավակ մայրիկն առայժմ իր ամբողջ ժամանակը տրամադրում է երեխաների խնամքին: «Ինձ համար միշտ էլ առաջնայինն ընտանիքն է եղել: Բացի այդ, հիմա ընդհանրապես ժամանակ չունեմ աշխատանքի մասին մտածելու: Երեխաների հետ շատ դժվար է որևէ այլ բանով զբաղվելը: Երբ երեխաներս ավելի մեծանան և մանկապարտեզ հաճախեն, այդ ժամանակ էլ կմտածեմ աշխատանքի մասին»,- ընդգծեց Քրիստինեն: Ի դեպ, նախկին մանեքենուհին երեխաների ծնվելուց հետո մոդելային կազմվածքը պահպանելու համար երկար ժամանակ սպորտով է զբաղվել: Այս մասին գրում է esyes.am-ը:

Գոհար Հարությունյանը 2 տարվա ամուսնական համատեղ կյանքի արդյունքում արդեն երկու դուստր ունի՝ Մելինեն և Բիայնան: Նախկին մանեքենուհին, սակայն, չի պատրաստվում սահմանափակվել երկու երեխայով: Գոհարն ու ամուսինը՝ Միքայելը, ցանկություն ունեն շա՜տ բալիկներ ունենալ: 2011թ. Գոհարը պատրաստվում է ևս մեկ անգամ մայրանալ. ցանկալի է՝ որդի, որը միակը չի լինի: Գոհարը ցանկանում է, որ շատ երեխաներ ծնվեն բոլոր հայ ընտանիքներում. որ այն լինի ոչ միայն իր, այլև ազգային գաղափար: Պարզվում է՝ գեղեցկուհուն երբևէ այնքան չի հրապուրել կարիերան, որքան սեփական ընտանիք կազմելն ու երեխաներ ունենալը: «Ժամանակին ես ընդունակ էի մարդկանց հիացնել իմ արտաքինով: Այսօր հպարտ կարող եմ ասել, որ օրգանիզմս ինձ լավագույն նվերն է մատուցել, ես նոր մարդ եմ լույս աշխարհ բերում. դրանից էլ հրաշալի ու արժեքավոր բա՞ն: Երեխաներիս ծնվելուց հետո արտաքինս բնավ էլ չի փոխվել, և շարունակում եմ պահպանել լավ կազմվածքս»,- անկեղծորեն նշեց գեղեցկուհին: Այդուհանդերձ, նա չի պատրաստվում այլևս չաշխատել ու միայն երեխաներ մեծացնել. բնավ: «Այսօր էլ հետաքրքիր գաղափարներ ունեմ, որոնք հնարավոր է, որ շուտով իրականացնեմ: Չի բացառվում, որ կրկին կմասնակցեմ գեղեցկության մրցույթի»,- ասաց գեղեցկուհի մայրիկը: Ի դեպ, Գոհարն ընտանիքով Երևանում կլինի մինչև գարուն. նրանք այստեղ նոր տուն են կառուցում:

Անգելինա Բաբաջանյանը և բիզնեսմեն Կարեն Մարտիրոսյանը այս տարի նշեցին իրենց ամուսնության 5-ամյակը: Ծանոթացել են, երբ Անգելինան ընկերներին հրավիրել էր իր իսկ պատրաստած խեցգետինները ճաշակելու, որ բավական աղի էր ստացվել: Այդ օրվա ողջ գիշերը Կարենը ծարավից ու Անգելինայի հմայքից չկարողացավ քնել... Այսօր զույգն արդեն երկու դուստր ունի՝ 4-ամյա Նատալին և 5 ամսական Վիկտորյան, որ ծնվել է այս տարվա հունիսի 22-ին: Գեղեցկուհին ասում է, որ նախկինում էլ կարիերայով այնքան տարված չէր, իր համար առաջնայինը միշտ էլ ընտանիքն է եղել: Նրա խոսքերով՝ անչափ շատ է սիրում իր ընտանիքն ու փորձում է հնարավորինս շատ ժամանակ անցկացնել ընտանիքի հետ: Սիրում է նաև իր աշխատանքը, թեպետ ներկայումս իր մասնագիտությամբ չի զբաղվում. ունի սեփական բիզնեսներ, իսկ նոր ծրագրերը դեռ մշակվում են: Իհարկե, դա չի նշանակում, թե նա չի հետևում իր արտաքինին: «Ես իմ արտաքինին հետևում եմ ինչպես միշտ՝ քնում եմ ռեժիմով, ուտում եմ այն ամենը, ինչ ցանկանում եմ: Իսկ երեխաների ծնվելուց հետո գիրանալու ընթացքը շատ հեշտ կարելի է հարթել»,- եզրափակեց նա:

Մանեքենուհի Յանա Բաբաջանյանն էլ ամուսնացավ, երբ 26 տարեկան էր: Ամուսնուն՝ Սերգեյին, թեև ճանաչում է 10 տարի, բայց միասին ապրում են շուրջ 3 տարի: Այս տարվա մարտի 10-ին ծնվեց նրանց առաջնեկը՝ Ալեքսանդրը: Տղան նրանց միակ բալիկը չի լինի, քանի որ Յանան ու Սերգեյը պատրաստվում են Ալեքսանդրի համար քույրիկ կամ եղբայրիկ ունենալ:

Յանան՝ Անգելինա Բաբաջանյանի հարազատ քույրը, այսօր բնակվում է ԱՄՆ-ում՝ Բոստոնում: Այժմ ֆիզարձակուրդում է, բայց պատրաստվում է 2-3 ամսից աշխատել իր առաջին մասնագիտությամբ՝ որպես դիմահարդար: Յանան վստահեցնում է, որ իր կարիերան որևէ կապ չունի անձնական կյանքի հետ. «Կարծում եմ՝ առհասարակ նորմալ, կիրթ ընտանիքներում աշխատանքի հետ կապված խնդիրներ չեն առաջանում: Ընդհակառակը, և՛ ես, և՛ ամուսինս հպարտանում ենք միմյանց աշխատանքային հաջողություններով: Այնպես որ, կարողանում եմ հավասարապես ժամանակս բաշխել և՛ ընտանիքիս, և՛ աշխատանքիս միջև»:

Գեղեցկուհի, մանեքենուհի Իրինա Թովմասյանի ամուսնական համատեղ կյանքը թեև կարճ տևեց, սակայն 19-ամյա գեղեցկուհին հասցրեց մայրանալ: Այս տարի նրա դստրիկը՝ Մեգին, դարձավ 7 տարեկան: Իրինան միշտ էլ կարևորել է սեփական երեխա ունենալու գաղափարը՝ միաժամանակ չանտեսելով նաև մասնագիտությունը: «Մասնագիտությամբ ես մոդել չեմ, ունեմ երկու կոնկրետ մասնագիտություն՝ անգլերենի թարգմանիչ և շուկայագետ: Այս տարիներին կարողացել եմ բավարար ժամանակ տրամադրել և՛ բալիկիս, և՛ աշխատանքիս»,- ասում է նա: Այսօր նախկին մանեքենուհին «Արարատ» հեռուստաալիքով վարում է «Հեքիաթն է կանչում» մանկական հաղորդումը՝ միաժամանակ աշխատելով «SPMS» մարքետինգային ընկերությունում՝ որպես վաճառքի բաժնի ղեկավար: Այնուամենայնիվ, Իրինան երազում է ևս 3 զավակ ունենալ: Ի դեպ, երրորդ զավակին նա պատրասվում է որդեգրել: Թե երբ՝ մեր հավատարիմ ընթերցողներին Իրինան խոստացավ առաջինն ասել: