Վ. Օսկանյանին մի հատ բերենք Սովետաշեն, բաց թողնենք, ինքը կարա՞ իրա տուն գնա, որ քաղաքապետ էլ դառնա

«Ըստ որոշ լուրերի` Երևանի ավագանու ընտրությունների «կուրացիան» այս անգամ իրականացնելու է ՀՀԿ-ական պատգամավոր Մհեր Սեդրակյանը»,-գրում է «Հրապարակ»-ը:

«Թվում էր՝ այս «սուրբ գործը» դրված էր Գագիկ Բեգլարյանի ուսերին, բայց, ինչպես երևում է, Սեդրակյանը նախագահական և խորհրդարանական ընտրություններում գերազանցել է բոլոր «ընտրակազմակերպչական» ռեկորդները և դարձել առաջամարտիկ: «Հրապարակ»-ը զրույցել է Մհեր Սեդրակյանի հետ.

-Ես ո՞վ եմ, որ իմ վրա նման պատասխանատվություն դրվի: Ստից բաներ են խոսում: Ես, բնականաբար, խառնվելու եմ, բայց իմ վրա պատասխանատվություն դրված չկա:

- Հետաքրքիր է` իսկ ինչպե՞ս եք խառնվում, շտաբնե՞ր եք բացում, ի՞նչ եք անում և, ընդհանրապես, ո՞նց եք դրսևորվելու այս ընտրություններում:

- Դե, մեր նախագահը ՀՀԿ նախագահն է, և Տարոնը`ՀՀԿ կուսակցության անդամ, բնականաբար, ես պետք ա խառնվեմ: Ոչ թե մենակ ես, այլ ՀՀԿ-ում ինչքան մարդ կա, բոլորն էլ խառնվում են, նորմալ ընտրություններ կազմակերպում:

-Պարոն Սեդրակյան, գուցե Ձեզ նո՞ր պիտի առաջարկեն, հաշվի առնելով, որ նախագահական ընտրություններում Ձեր համայնքում բարձր արդյունքներ գրանցեցիք՝ շնորհիվ ձեր «հմտությունների», հիմա էլ, հավանաբար, ուզում են Փեր փորձառությունն ամբողջ Երևանի վրա կիրառել:

-Ես նման կաշկանդված... ես ընդհանրապես որևէ խնդիր չունեմ: ...Դե, փորձը փորձանք չի, (թող օգտագործվի նկատի ունի իր փորձառությունը), ի՞նչ ա եղել: Եթե կարող ենք նորմալ ընտրություններ անել՝ առանց կեղծիքների, և հաղթենք, շատ լավ, կարող են օգտագործել նաև իմ փորձը, էլի: Իսկ պատասխանատվություն առայժմ չկա:

-Պարոն Սեդրակյան, անկեղծ խոստովանեք, հնարավո՞ր է առանց կեղծիքների հաղթանակ գրանցել ՀՀԿ-ի օգտին, Դուք «քաղաքի տղայի», երևանցու համբավ ունեք, մայրաքաղաքի այսօրվա խնդիրների պարագայում ՀՀԿ-ի հաղթանակն իրատեսակա՞ն եք համարում:

- Ինչի՞ չի լինի որ: Հիմի նախագահական ընտրություններում կեղծիքներ կա՞ր, նախագահական ընտրություններին էլ մաքուր աշխատեցինք, էս ընտրություններին էլ կաշխատենք, նորմալ է, ի՞նչ է եղել որ: Բա ուրիշ ո՞վ պետք է լինի: ...Չէ, Դուք ինձ ասեք՝ ո՞վ պետք ա լինի, էդ ցուցակներում մյուս կուսակցություններից ո՞վ կա քաղաքապետի թեկնածու, որ... էս բոլորը հաշվի պտի առնվի, չէ՞:

- Ինչո՞ւ եք այդպես ասում, օրինակ, Վարդան Օսկանյանն է ԲՀԿ-ի ցուցակը գլխավորում...

- Վարդան Օսկանյանին մի հատ բերենք Սովետաշեն, բաց թողնենք, ինքը կարա՞ իրա տուն գնա, կգտնի՞ իրա տան տեղը, որ քաղաքապետ էլ դառնա:

-... Վահագն Խաչատրյանը՝ նախկին քաղաքապետ, ՀԱԿ ցուցակում:

-Եկեք մեռելների մասին չխոսենք, մենք խոսում ենք նոր... Դրանք անցած պատմություններ են, վերջացել են, ոնց որ հարամելու համար սնկի պես դուրս են գալիս, աճում են, մենք ունենք մեր քաղաքապետը, մենք՝ մեր քաղաքի ժողովուրդս, ուզում ենք Տարոն Մարգարյանին: Հիմա ոնց որ իրանք մտածում են, դա իրանց խնդիրն է, բայց մենք արդեն որոշել ենք, երևանցիներով ուզում ենք մեր քաղաքապետը լինի Տարոն Մարգարյանը: