Ինչո՞ւ Սերժ Սարգսյանը կմնա միայնակ ապրիլի 9-ին

Մի քանի օր ևս, և մենք մարզահամերգային համալիրում ականատես կլինենք Սերժ Սարգսյանի՝ այդքան սպասված երդմնակալության արարողությանը: Չնայած Րաֆֆի Հովհաննիսյանի՝ ըստ էության, սպառնալիքներին՝ սեփական կյանքով, այնուամենայնիվ, արարողությանը ՀՀԿ-ն պատրաստվում է ջանասիրությամբ և մանրակրկիտ ձևով՝ մանավանդ հյուրերի հարցում:

Այո, այսօր Հայաստանում ստեղծված ներքաղաքական իրավիճակը թույլ է տալիս անել մի քանի հետաքրքրական եզրակացություն, և առաջին հերթին՝ հենց Սերժ Սարգսյանի երդմնակալության արարողությանը՝ հնարավոր հյուրերի առումով:

Նախ՝ տարիներ առաջ, երբ տեղի ունեցավ Սերժ Սարգսյանի՝ ընտրված նախագահի երդմնակալության արարողությունը, շատ շատերն այն անվանեցին սգո արարողություն, այն դատարկ էր, մեկուսացված ու պարալիզացված, սակայն հյուրերի տեսանկյունից այն բավականին հագեցած էր՝ ներկա էին ԱԺ բոլոր 131 պատգամավորները, հարյուրավոր օտարերկրացի բարձրաստիճան պաշտոնյաներ, այդ թվում՝ ԱՄՆ-ն ներկայացնող Մեթյու Բրայզան և ԱՄՆ գործերի ժամանակավոր հավատարմատարը։ Եվրոպական երկրները ներկայացված էին երկրում հավատարմագրված իրենց դեսպաններով, ներկա էր Վրաստանի վարչապետը, ռուսական դումայի փոխխոսնակը, Կովկասում ԵՄ-ի հատուկ ներկայացուցիչ Պիտեր Սեմնեբին և այլք։ Այս անգամ, սակայն, ստեղծվել է բոլորովին այլ՝ 2008-ից տարբերվող իրավիճակ, հետևաբար, այս անգամ արդեն երդմնակալության արարողության հյուրերի ցուցակը կազմելիս բավականին հաշվենկատություն պետք է որ ցուցաբերեն Սերժ Սարգսյանն ու իր թիմը:

Առաջին հերթին՝ այս վերջին շրջանում ՀՀԿ նախագահի, և ոչ միայն իշխանությունների հետ բավականին կոնֆլիկտային հարաբերությունների մեջ են Հայաստանում գործող մի քանի դեսպանատներ, մասնավորապես՝ դրանց շարքերը կարելի է դասել Մեծ Բրիտանիայի դեսպանին, ԱՄՆ դեսպանին, Լիտվայի դեսպանին (նորաթուխ բլոգերներին), և դեսպանների այս շարքը կարելի է շարունակել, այսինքն՝ այս տարի արդեն ինտրիգային նշանակություն կունենա եվրոպական երկրների դիրքորոշումը երկրում նախագահական ընտրությունների առումով, որն էլ կարող է արտահայտվել դեսպանների հայտնվելուն ապրիլի 9-ի երդմնակալության արարողությանը:
Այնուհետև՝ այս անգամ 131 պատգամավորներից, նախորդ տարվա համեմատ, ոչ բոլորը ներկա կգտնվեն այդ արարողությանը, մասնավորապես՝ ՀԱԿ, «Ժառանգություն» կուսակցությունների ներկայացուցիչները կտրականապես մերժել են այցելության հնարավոր տարբերակը, որից հետո՝ նաև ՀՅԴ-ն, որին ևս կարելի է չընդգրկել հյուրերի ցուցակում՝ հաշվի առնելով Ազատության հրապարակում ՀՅԴ ներկայացուցչի խոսքերը, և վերջապես՝ այս օրերի ընթացքում բազմաթիվ խոսակցությունների թեմա դարձած ԲՀԿ-ի, և մասնավորապես՝ Դուբայից նոր վերադարձած Գագիկ Ծառուկյանի ներկայության մասին արարողությանը։ Ըստ ԲՀԿ-ականների՝ այս հարցի շուրջ քննարկումներ կուսակցությունում դեռ չեն եղել, սակայն այս պարագայում ևս շատ բարդ կլինի հավատալ ԲՀԿ-ի ներկայությանը ՄՀՀ-ում ապրիլի 9-ին՝ հաշվի առնելով այն, որ ԲՀԿ-ն դեռ անգամ շնորհավորական ուղերձ չի հղել Սերժ Սարգսյանին և կուսակցությանը, մինչդեռ նախորդ անգամ հենց նաև ԲՀԿ-ականներն էին զբաղվում արարողության պատրաստություններով: Եվ վերջապես, այս անգամ ևս սգո արարողության ընթացքում, իհարկե, իսպառ կբացակայի քաղաքացի-նորընտիր նախագահ կապը, որը, թերևս, նախորդ անգամ բոլորի ուշադրությունը հրավիրել էր իր վրա, մասնավորապես՝ դիտորդների, ովքեր ուղղակի ապշել էին Ազատության հրապարակի դատարկությունից:

Այսպիսով՝ Սերժ Սարգսյանին չի մնում այլ տարբերակ՝ բացի երդմնակալության արարողությանը սեփական կուսակցության պատգամավորների և, իհարկե, ՕԵԿ պատգամավորների դեմքերը տեսնելուց: Եվ իհարկե, այս անգամ արդեն, ի տարբերություն նախորդի, Ազատության հրապարակը, սպասվում է, որ լինելու է լիքը ՀՀ քաղաքացիներով, և, անշուշտ, Ազատ բոլորի համար: Իսկ Սերժ Սարգսյանին անհրաժեշտ է լուծել այն գլուխկոտրուկը, թե ումով է լցնելու ՄՀՀ-ը, դատարկությունն ու սգո արարողությունը լուսավորելու և համապատասխան մարդաքանակն ապահովելու համար: Ու հերթական անգամ Սերժ Սարգսյանին մնում է մնալ միայնակ:

Գևորգ Ավետիսյան