Ղարաբաղյան հակամարտությունը մոտենում է պատերազմի. ՌԴ դումայի պատգամավոր

Ռուսաստանի պետդումայի պատգամավոր, տեղեկատվական քաղաքականության և տեղեկատվական տեխնոլոգիաների հարցերով խորհրդարանական հանձնաժողովի նախագահ Ալեքսեյ Միտրոֆանովը կարծում է, որ շուտով կբռնկվի հայ-ադրբեջանական նոր պատերազմ: Այս մասին նա ապրիլի 3-ին հայտարարել է Մոկսվայում կայացած «Ռուս լրագրողների նկատմամբ օտարերկրյա իշխանությունների կիրառած դիսկրիմինացիոն միջոցները» թեմայով կլոր սեղանի քննարկման ժամանակ. տեղեկացնում է ИА Regnum-ը: 

Մեկնաբանելով ռուս լրագրող Միլրադ Ֆատուլլաևի հետ կապված դեպքը, ում Բաքվի օդանավակայանում արգելել էին մուտք գործել Ադրբեջանի տարածք, քանի որ նա եղել էր Ղարաբաղում, պատգամավորն ասել է. «Հայ-ադրբեջանական հակամարտությունը մոտենում է ռազմական փուլի: Բոլոր նրանք, ովքեր եղել են Ղարաբաղում, այսուհետ Ադրբեջանում համարվում են պերսոնա նոն գրատա: Եվ ռուս լրագրողի ձերբակալությունը ևս մեկ անգամ մեզ հասկացնել է տալիս, որ պատերազմի պատրաստություն է գնում: Պետք է հասկանալ, որ կոնտակտային պատերազմներ չեն լինի, կճնշվեն մի քանի ժամվա ընթացքում գերճշգրիտ զենքի միջոցով»,-կանխատեսում է Միտրոֆանովը: