Ուսանելի և հետաքրքիր առօրյա` ուսանողների համար

Կարևորելով ՀՀ ԱԻՆ ճգնաժամային կառավարման պետական ակադեմիայի դերն ու նշանակությունը մասնագետների պատրաստման գործում, ինչպես նաև ուսանողների բազմակողմանի զարգացման խնդիրը' ԱԻ նախարար Ա. Երիցյանը հանձնարարել է ակադեմիայի ուսանողների համար պարբերաբար այցելություններ կազմակերպել տարբեր մշակութային օջախներ ու պատմական տեսարժան վայրեր։

Ահա և ակադեմիայում ուրախ անցուդարձ է... Կազմակերպվում է հերթական էքսկուրսիան: Ակադեմիայի տարբեր կուրսերի շուրջ 30 ուսանողներ կուրսղեկների և ուսումնական բաժնի պետի ուղեկցությամբ այցելեցին ՀՀ Արարատի մարզի Արարատ գյուղ' պետական, քաղաքական և ռազմական գործիչ, ՀՀ Ազգային հերոս, Արցախի հերոս Վազգեն Սարգսյանի տուն-թանգարան, որտեղ ծանոթացան Սպարապետի կյանքին ու գործունեությանը, նրա կողմից հեղինակած գրքերին:

Այցի նպատակն էր բարձրացնել տեղեկացվածությունն ազատամարտի հերոսի մասին, հայրենասիրության զգացումը և սեփական հողն ու ջուրը պաշտպանելու կարևորությունը:

Օրերս ուսանողները եղել են Խոր Վիրապում, Մայր Աթոռ Սուրբ Էջմիածնում, Էջմիածնի Սուրբ Գայանե վանքում, Սուրբ Հռիփսիմե եկեղեցում ինչպես նաև հայ ազգի և եկեղեցու նվիրյալ ժառանգորդներ, մեծ բարերարներ Ալեք և Մարի Մանուկյանների Գանձատուն-թանգարանում, որը բացվել է 1982 թվականին: Նրանք ծանոթացան Գանձատանը ցուցադրվող բազմաթիվ արժեքավոր նմուշների ու ձեռագիր արձանագրությունների, եկեղեցական պարագաների և այլն:

«Մոսկվա» կինոթատրոնի տնօրինությունն աջակցել է ակադեմիայի մոտ 80 ուսանողների «Գարեգին Նժդեհ» գեղարվեստական կինոնկարի դիտմանը, որը պատմում է հայազգի պանծալի զավակ, սպարապետ Գ. Նժդեհի անցած ռազմական փառապանծ ու դժվարին ուղու մասին:

Մարտի 26-ին տեղի ունեցավ «Աջակցություն արտադրական անվտանգության վերաբերյալ գիտելիքների հարստացմանը բարձրագույն ուսումնական հաստատություններում» ծրագրի շրջանակներում ամփոփիչ հանդիպում, որը կազմակերպվել էր «Էկոլոգիան հանուն խաղաղ գոյակցման» գիտական, էկոլոգիական հասարակական կազմակերպության կողմից, որտեղ ներկա էին Գերմանիայի շրջակա միջավայրի դաշնային գործակալության, ՀՀ արտակարգ իրավիճակների, բնապահպանության նախարարությունների ներկայացուցիչներ, մասնագետներ Ռումինիայից, Չեխիայից, Մոլդովայից, Տաջիկստանից, Ուզբեկստանից և ՄԱԿ ԵՏՀ այլ երկրներից, ինչպես նաև արտադրական ձեռնարկություններից ու բուհերից:

Հանդիպմանը ներկայացվեցին նաև 2012 թ. հուլիսին Ալավերդու պղնձաձուլական գործարանում ուսանողների անցկացրած ուսումնա-արտադրական պրակտիկայի արդյունքները։

Մարտի 30-ին ակադեմիայի 3-րդ կուրսի շուրջ 20 ուսանողներ այցելել են Ավետիք Իսահակյանի և Արամ Խաչատրյանի տուն-թանգարաններ' ծանոթանալով մեծանուն բանաստեղծի ու աշխարհահռչակ կոմպոզիտորի կյանքին ու ստեղծագործություններին: