Անժելա Մկրտչյան. Կանացի լինելու գաղտնիքները

Ողջո՛ւյն, այսուհետև իմ աղջկական խորհուրդները քեզ տալու եմ նաև «Ե՞ս Yes!» ամսագրի էջերից: Քանի որ կանանց տոներն է, ուզում եմ խոսել կանացիությունից: Մի հատկանիշ, որը շա՜տ կարևոր է յուրաքանչյուր աղջկա համար: Մեզանից յուրաքանչյուրն իր սեռի առաջ պարտավորություն ունի՝ լինել կանացի :) Իսկ դրա համար ես քեզ այսօր մի քանի գործնական խորհուրդ կտամ :)

Սկսենք հագուստից: Նախընտրելի է, որ շորեր, կիսաշրջազգեստներ հաճախ հագնես, քանի որ դա ավելի է ընդգծում մեր կանացիությունը: Տաբատներ ընտրելիս հաշվի առ, որ դրանք պետք է կտորից լինեն: Ջինսե տաբատներն ու հագուստը սպորտային են, որը ցանկալի չէ հագնել նույնիսկ առօրյայում: Կեդեր, ջինսեր, սպորտային հագուստ... ուզո՞ւմ ես կանացի լինել, մոռացի՛ր սրանց մասին: Մեկ կարևոր հանգամանք ևս. տաբատն ընտրելիս ուշադիր եղիր, որ այն լինի մեջքից, ոչ թե կոնքերից: Բարձր մեջքով տաբատները ոտքերն ավելի երկար են ցույց տալիս, կազմվածքն էլ' գեղեցկացնում :)

Ցանկալի է, որ աղջիկը հաճախ հագնի վերնաշապիկներ, բլուզներ, որոնք ընդգծում են կոնքերն ու կազմվածքը: Այլ հագուստ ընտրելիս ևս հաշվի առ կոնքերն ընդգծելու հանգամանքը, քանի որ դա շատ կարևոր է:

Գունային համադրություններ անելիս պետք է շատ զգույշ լինել. եթե ընտրել ես վառ գույնի զգեստ, դրա հետ կարող ես հագնել սև կամ ոչ վառ գույնի կոշիկ և նույն երանգի պայուսակ բռնել: Պետք չէ գունային խառնաշփոթ ստեղծել: Վառ գույների համադրությունը ոչ միշտ է հաջող ստացվում: Այդ հարցում պետք է շատ ուշադիր լինել: Ցանկալի է հագուստի վրայի նախշերը ևս շատ վառ և շատ մեծ չլինեն: Նուրբ նախշերը քեզ էլ նրբություն կհաղորդեն:

Ինչ վերաբերում է կոշիկներին, այժմ շատ նորաձև են սուր, բայց կարճ քթով կոշիկները, այնպես որ, նկատի՛ ունեցիր: Եվս մի անհերքելի փաստ. բարձրակրունկները շատ ավելի գեղեցկացնում են ոտքերն ու սլացիկ դարձնում, սակայն կրունկների բարձրությունը պետք է չափավոր լինի, որպեսզի ի վիճակի լինես դրանց վրա ուղիղ և գեղեցիկ քայլել :) Ինչպես ասում են՝ բարձրակրունկներ հագնելիս պետք է «արժանապատիվ» կանգնել դրանց վրա: Այնպես որ ընտրիր միջին բարձրության կոշիկներ:

Աքսեսուարներ ընտրելիս ուշադիր եղիր. մեծ և աչքի ընկնող աքսեսուարները ոչ միշտ են գեղեցիկ: Հագուստի հետ կարելի է համադրել որևէ նուրբ վզնոց, ականջօղեր: Ի դեպ, ոճաբանների համոզմամբ՝ կատարյալ համադրություն է, երբ վզնոցը համապատասխանում է մատանուն, ականջօղերը՝ ապարանջանին:

Եթե այսքանն արդեն արել ես, անցնենք հաջորդ՝ շատ կարևոր հարցին: Միայն հագուստի ճիշտ ընտրությունը շատ քիչ է կանացի լինելու համար: Դու կարող ես աշխատել հազարավոր ոճաբանների հետ, սակայն արդյունքը զրոյական լինի, քանի որ շատ կարևոր է մատուցման ձևը:
Պետք չէ կտրուկ, արագ շարժումներ անել: Շարժումներդ ու ժեստերդ քո մասին կարող են ավելին ասել, քան հագուստդ: Դրանք պետք է նուրբ լինեն: Եթե սրճարանում ես սնվում, կեր շատ դանդաղ և հանգիստ: Խոսելիս էլ մի՛ գոռա: Քեզ շատ լավ և նույնիսկ ավելի հաճույքով կլսեն, կընկալեն, եթե ցածր և հանգիստ տոնով խոսես:

esyes.am