Եթե Րաֆֆի Հովհաննիսյանը չի կարողանում զանգված հավաքել, ապա ինչո՞ւ պետք է գործող նախագահը զիջումների գնա

«Երբ Րաֆֆի Հովհաննիսյանը պահանջներ է ներկայացնում Սերժ Սարգսյանին, նա պետք է գիտակցի, որ այդ պահանջները ստանալու համար պետք է ճնշում գործադրի, նրա ետևում պետք է կանգնած լինի հոծ զանգված»,- «168 ժամի» հետ զրույցում խոսելով ընդդիմադիր շարժման առաջնորդ Րաֆֆի Հովհաննիսյանի քայլերի մասին՝ ասել է քաղաքագետ Երվանդ Բոզոյանը, ում կարծիքով՝ «Բարևի» շարժման առաջնորդի քայլերը համարժեք չեն այն իրավիճակին, որում նա հայտնվել է:

«Այսինքն՝ այն քայլերը, որը նա անում էր, դրանցով հնարավոր չէր ձևավորել, այսպես ասած, կրիտիկական զանգված, որի միջոցով նա կկարողանար ճնշումներ գործադրել գործող իշխանությունների վրա»,- նշել է քաղաքագետը:

Եթե նախորդ նախագահական ընտրությունների և դրանց հաջորդած զարգացումների ժամանակ Աժ շենքի մոտ կամ Ազատության հրապարակի շրջակայքում իշխանությունը ջրցան մեքենաներ և ոստիկանական բանակ էր տեղակայել, ապա, ըստ Ե. Բոզոյանի վերջին ընտրություններից հետո դրանք չկային, քանի որ «իշխանությունը երբևիցե մտահոգված չի եղել»: «2008թ. ընդդիմության թեկնածուն՝ Լևոն Տեր-Պետրոսյանը, կարողանում էր համախմբել մարդկանց Ազատության հրապարակում, մինչդեռ ներկայիս թեկնածուն չգնաց այդ ճանապարհով, և ինձ զարմացնում է՝ եթե նա չի կարողանում այդպիսի զանգված հավաքել, ապա ինչո՞ւ պետք է գործող նախագահը զիջումների գնա»,- ասել է Ե.Բոզոյանը: