Սիրո խոստովանություն Հռիփսիմե Հակոբյանից

Հայաստանի ազգային պատկերասրահի ցուցասրահներից մեկում, ինչպես նաեւ Սիրահարների այգում օրերս նկարահանվել է երգչուհի Հռիփսիմե Հակոբյանի “Խոստովանություն” երգի տեսահոլովակը, որին ներկա է եղել նաեւ BRAVO.am-ը:

“Լիրիկական “Խոստովանությունն” արդեն հասցրել է սիրվել, եւ հենց դա է պատճառը, որ որոշեցինք անպայման տեսահոլովակ նկարահանել այս երգի հիման վրա: Մեծ պատասխանատվություն է Ազգային պատկերասրահում նկարահանում իրականացնելը”,-մեզ հետ զրույցում ասել է Հռիփսիմե Հակոբյանը:

“Խոստովանություն” երգի երաժշտության հեղինակը Հայկոն է, խոսքերը գրել է Վարդան Զադոյանը: “Շեշտը դրված էր լուսավոր երգ ստանալու վրա, եւ կարծում եմ՝ այդպես էլ եղել է”,-նշել է երգչուհին:

Տեսահոլովակի ռեժիսորը Արեն Բայադյանն է, օպերատորը՝ Արտյոմ Աբովյանը: Սա ռեժիսորի եւ երգչուհու երկրորդ համագործակցությունն է. նախորդ՝ “Տարօրինակ” տեսահոլովակը դիտեք այստեղ: Նկարահանումներին Հռիփսիմե Հակոբյանի ոճով զբաղվել է Արայիկ Գաբաջյանը. “Նա ուշադիր է եղել բոլոր մանրուքներին: Օրինակ՝ եղունգներս նույնությամբ կրկնել են վերնաշապիկիս գույներն ու նախշերը”:

Հռիփսիմե Հակոբյանի խոսքով՝ երգը սիրո խոստովանություն է. “Տեսահոլովակում էլ տարբեր տարիքի մարդիկ սիրո խոսքեր են գրում ցուցասրահում տեղադրված մեծ կտավին: Երբ ծանոթացա տեսահոլովակի սցենարին, միանգամից հավանեցի: Իհարկե, ընթացքում որոշ փոփոխություններ եղան: Կարծում եմ' ամեն ինչ շատ համահունչ է ստացվել”:

Երգչուհին նշել է, թե պետք չէ մտածել, որ “Խոստովանությունն” իր սիրո խոստովանությունն է. “Մի աղջիկ իմ միջոցով ցանկացավ սեր խոստովանել իր ամուսնուն… Այս երգը կարող է սիրո խոստովանություն լինել բոլոր սիրող սրտերի համար”:

“Խոստովանություն” երգի տեսահոլովակի պրեմիերան նախատեսված է առաջիկա օրերին, մինչ այդ առաջարկում ենք լսել երգը: