«Թոփլես-ջիհադ»՝ FEMEN-ից

Ֆրանսիայի մայրաքաղաքում նախօրեին տեղի է ունեցել ապրիլի 4-ին նախատեսված «թոփլես-ջիհադի» միջազգային օրվան նվիրված առաջին ակցիան, որը հայտարարել է սկանդալային FEMEN կազմակերպությունը:

Անցած շաբաթ շարժման ղեկավարությունը կամավորներին ու ակտիվիստներին կոչ էր արել մերկանալ ու ամբողջ աշխարհում Թունիսի դիվանագիտական ներկայացուցչության մոտ անցկացնել բողոքի զանգվածային ակցիաներ:

Ըստ FEMEN-ի՝ դա պատասխանն է այն մահվան դատավճռի, որը կայացվել էր իսլամիստ ակտիվիստ 19-ամյա Ամինե Թայլերի նկատմամբ՝ սոցցանցերում իր կիսամերկ լուսանկարները հրապարակելու համար:

Ինչպես հայտնում է FEMEN-ի կայքը, երեկ Թունիսից մեկ այլ ակտիվիստ՝ Մերիամ անունով, իր երկու ընկերուհիների հետ մերկացել է Փարիզում գլխավոր մզկիթի դիմաց ու այրել սալաֆիների դրոշը՝ «որպես վայրի կրոնական ծայրահեղականության դեմ կնոջ պայքարի խորհրդանիշ»:

Արևելքցի կանանց կոչ անելով կրծքով ապահովել մոլորակի ազատ ապագան՝ FEMEN-ը հռչակում է. «Իսլամիզմն անուժ է մեր ապստամբած մարմինների դիմաց»՝ հայտնում է NEWSru Israel-ը:

Հավելենք, որ Թունիսում իսլամիստ առաջնորդ Ալամ Ադելը ֆեթվա էր արձակել Ամինա Թայլերի նկատմամբ, քանի որ վերջինս սոցցանցերում հրապարակված կիսամերկ լուսանկարների վրա արաբերենով գրել էր. «Իմ մարինը պատկանում է միայն ինձ ու չի ներկայացնում ինչ-որ մեկի պատիվը»: Մյուս լուսանկարում նա անգլերեն գրել էր. «Թքած ունեմ ձեր բարոյականության վրա»: Այս մասին գրում է 1in.am-ը:

Մուսուլման առաջնորդը իր ֆեթվայում հայտարարել է, որ ըստ շարիաթի կանոնների՝ Ամինան նախ պետք է ստանա 80-100 մտրակի հարված, ապա նրան պետք է քարկոծելով սպանել, քանի որ նրա գործողությունները կարող են «հասարակությունում համաճարակ» առաջացնել: