Արա Մարտիրոսյանի «Հայրիկը»՝ հեռուստաէկրաններին

Արա Մարտիրոսյանի երկրպագուներն ուրախանալու նոր առիթ ունեն. ապրիլի 10-ին հեռուստաէկրաններին կլինի Արայի նոր տեսահոլովակը՝ «Հայրիկը»՝ նվիրված բոլոր հայրերին: Տեսահոլովակը նկարահանվել է իրական պատմության հիման վրա, որը թեև մի մարդու կյանքի մասին է, սակայն ներկայացնում է հավաքական հոր կերպար: Տեսահոլովակում ներկայացված են տարբեր ժամանակահատվածներ՝ 70-ական-90-ական թվականներն ու մեր ժամանակները:

Երգի և տեսահոլովակի մտահաղացումը ոճաբան Անի Ավդալյանին ու Արեն Բայադյանինն է, բառերն ու երաժշտությունը՝ Արա Մարտիրոսյանինը, իսկ ռեժիսորն է Արեն Բայադյանը:

«Տեսահոլովակի հիմնական աշխատանքներով զբաղվել եմ ես: Մեզ պետք էին պրոֆեսիոնալ մարդիկ, որի համար էլ՝ որպես ռեժիսոր, ընտրեցինք հենց Արեն Բայադյանին, ում տաղանդի շնորհիվ կարողացանք իրագործել այս նուրբ նախագիծը, իսկ երգի բառերը, երաժշտությունն ու կատարումը՝ Արա Մարտիրոսյանին: Մենք չունենք երգ, որը նվիրված է հայրերին, հիմնականում մոր մասին երգեր են, դրա համար որոշեցինք հորը նվիրված այս տեսահոլովակը»,- պատմեց Անին:

Տեսահոլովակում միակ հայ դերակատարը փոքրիկ Արման Ադիլխանյանն է, մյուսները՝ վրացիներ են՝ Մեդեա Աբակելիան, Գոգա Չկեյձեն, Դավիթ Կացարովան, որոնց ընտրույթունը Անի Ավդալյանը պայմանավորեց նոր ու թարմ դեմքերի անհրաժեշտությամբ:

«Ի սկզբանե որոշված էր, որ լինեն վրացի դերասաններ, բայց ոչ այն պատճառով, որ մեր դերասանները լավը չեն. պարզապես նոր շունչ ու նոր դեմքեր էինք ուզում, որոնք ո՛չ սերիալներում, ո՛չ գովազդային հոլովակներում դեռևս չկան: Երեք հայ դերասաններ ունենք, որոնք գլխավոր դերեր են մարմնավորում, ինչպես նաև բոլոր էպիզոդիկ դերերում հայեր են նկարահանվել»,- նշեց ոճաբանը:
Ըստ նրա՝ տեսահոլովակի նկարահանումները տևել են 3 ամիս:

«Աշխատել ենք երկար, ամեն մանրուք, ամեն դետալ նախապես որոշված և ընտրված էր, որ հանկարծ ոչ մի թերություն չլինի ու, կարծում եմ, չկա: Շատ նուրբ թեմա է և պետք է շատ լավ աշխատեինք: Վրաստանից հրավիրվել էին կինոգրիմյորներ, որոնց հետ համատեղ աշխատել են նաև իմ իմիջ կենտրոնի աշխատակիցները: Ամեն բան սրտանց է արվել ու, կարծում եմ, բարի գործ է ստացվել»,- նկատեց Անին: