Նունե Եսայան. խոսքերը զորավոր են, իսկ լռությունը ոչինչ անել չի կարող

Cosmopolitan-ը հյուրընկալվել է երգչուհի Նունե Եսայանի տուն՝ մի փոքրիկ զրույցի շրջանակներում ներկայացնելու երգչուհու անկեղծությունը: Մինչ Նունեն խոսում էր հաջողակ լինելու, կին և տղամարդ հարաբերությունների մասին, նրա որդին լուռ, առանց միջատմելու հետևում էր հարցազրույցին...

Ի՞նչպես եք վերաբերում հաճոյախոսություններին, հատկապես, եթե դրանք ուղղված են Ձեզ: Ինչպիսի՞ հաճոյախոսություններ եք Դուք անում Ձեր շրջապատի մարդկանց:

-Հաճոյախոսությունները թե´ կանանց, թե´ տղամարդկանց ուղղված, նախ տրամադրություն են բարձրացնում: Կարևոր չէ, թե այդ օրը ինչ հագուստ ես կրում կամ ինչ դիմահարդարում ունես, մի փոքր հաճոյախոսություն, որ «դեմքդ փայլում է» կամ «ինչ լավ տեսք ունես դու», և բարձր տրամադրությունն ամբողջ օրվա ընթացքում ապահովված է: Ինձ որպես հաճոյախոսություն ասում են, որ իմ տարիքից փոքր եմ երևում, դա հաճելի հաճոյախոսություն է: Ինձ ուղղված հաճոյախոսությունները փոխադարձ են լինում:

-Ինչպե՞ս եք ընկալում հաջողակ և ինքնաբավ կնոջը: Հնարավո՞ր է, որ Ձեր այդ պատկերացրած կինը դուրս գա փողոց և բարձր գոռա իր հաջողության կամ ասենք որոշի երեկոն միայնության մեջ վայելել հեռավոր մի լքված վայրում:

-Ես միշտ դեմ եմ եղել այն կարծրատիպին, որ ասում են՝ հաջողությունների մասին մի´ բարձրաձայնիր, աչքով կտան: Ես կարծում եմ, եթե երջանիկ ես, պետք է բարձրաձայնես, միևնույն է՝ այն արդեն երևում է քո աչքերում: Ես բազմիցս ասել եմ՝ երջանկությունն այն չէ, որ երազանքներն իրականություն են դառնում, այլ այն, որ ամեն առավոտ արթնանում ես, առողջ ես, խաղաղ է ընտանիքդ՝ արդեն երջանկություն է, սիրում ես գործդ, ուրեմն՝ երջանիկ ես: Հաջողակ կինը պետք է լավ մանկություն ունեցած լինի, իր երազած կյանքի եթե 50 տոկոսն էլ իրականություն դարձած լինի, ուրեմն հաջողակ կին է: Միայնակ մարդը չի կարող հաջողակ լինել, պետք է թիմ ունենա, իրեն հավատարիմ և քաջալերող մարդիկ:

-Ո՞ր իրավիճակներում եք ապավինում Աստծուն:

-Ես միշտ մտովի Աստծո հետ եմ առավոտյան, երեկոյան իմ աղոթքներով: Ես իմ աղոթքներում մենակ չեմ, աղոթում եմ բոլորի համար, բոլորի խաղաղության համար:

-Հավատու՞մ եք սիրո հավերժության գաղափարին: Ո՞րն է կին և տղամարդ հարաբերություններում ներդաշնակության և վստահության՝ Նունե Եսայանի կարգախոսը:

-Հարաբերություններում, իհարկե, կարևոր է վստահությունը, սակայն չեմ կարծում, որ կա մի ընտանիք, որտեղ անմեղ գաղտնիքներ չկան: Եթե ընկերուհիս ինձ մի բան է ասել, ես չեմ կարող ինձ թույլ տալ դա ամուսնուս ասել: Պետք է լինի սեր, որի մասին անպայման բարձրաձայնվի ամեն օր, դա ամոթ չէ, մենք ասում ենք իրար և անկեղծորեն ենք դա անում: Երեխան ևս ընտանիքի երջանկության կարևոր մաս է, այն կարծես ընտանիքն ավելի ամուր է դարձնում:

-Երբ բարկանում եք անհավատարիմ մարդկանց և կյանքի անարդարությունների համար, ինչպե՞ս եք կարողանում հաղթահարել վատ տրամադրությունը և նորից հույսով լցվել:

-Ես ինքս իմ մեջ կարող եմ լուռ տանել այդ բարկությունը: Մինչև այսօր իմ մոտ չի եղել պոռթկում. ես շատ զուսպ մարդ եմ, ուղղակի կարող եմ թողնել և հեռանալ կամ մի որոշ ժամանակ կտրվել իմ այդ բացասական մտածմունքներից: Լռությամբ եմ հաղթահարում իմ ներսի բարկությունը:

ՀԳ. Նունե Եսայանը կին և տղամարդ հարաբերություններում խորհուրդ է տալիս զգացմունքների մասին բարձրաձայնել, քանի որ խոսքերը զորավոր են, իսկ լռությունը ոչինչ անել չի կարող: