Պայքար Երևանի համար

Վաղը՝ ապրիլի 7-ին, նշվում է Մայրության և գեղեցկության տոնը. այդ օրը Երևանում կտրվի մայիսի 5-ին կայանալիք ավագանու ընտրությունների նախընտրական քարոզարշավի մեկնարկը։

Առաջադրված կուսկացությունները 7-ն են՝ «Առաքելություն», «Բարգավաճ Հայաստան», «Հայ ազգային կոնգրես», «Հայ Յեղափոխական Դաշնակցություն», «Հայաստանի Հանրապետական», «Օրինաց երկիր» կուսակցություններ և «Բարև Երևան» կուսակցությունների դաշինքը։

Հայաստանի Հանրապետական կուսակցությունն ավագանու ընտրություններին կմասնակցի 195 հոգուց բաղկացած ընտրացուցակում, որը գլխավորում է գործող քաղաքապետ Տարոն Մարգարյանը։

«Բարգավաճ Հայաստան» կուսակցության ցուցակը մեկ հոգով պակաս է ՀՀԿ ցուցակից, 194 հոգանոց ցուցակը գլխավորում է ԲՀԿ-ական պատգամավոր, նախկին արտգործնախարար Վարդան Օսկանյանը։

ՀՅԴ ավագանու ընտրացուցակը բաղկացած է 65 հոգուց, որը գլխավորում է ՀՅԴ խորհրդարանական խմբակցության ղեկավար Արմեն Ռուստամյանը։

«Բա՛րև, Երևան» կուսկացությունների դաշինքը ընտրություններին կմասնակցի 64 հոգանոց ընտրացուցակով, այն գլխավորում է «Ժառանգություն» կուսակցության փոխնախագահ Արմեն Մարտիրոսյանը։

«Հայ ազգային կոնգրեսը» կմասնակցի 42 հոգուց բաղկացած ցուցակով. այն գլխավորում է Վահագն Խաչատրյանը։

«Օրինաց երկիր» կուսակցության ցուցակը գլխավորում է ԱԻ նախարար Արմեն Երիցյանը, ցուցակը բաղկացած է 105 հոգուց։

«Առաքելություն» կուսակցության ընտրացուցակը բաղկացած է 29 հոգուց, որը գլխավորում է Մեսրոպ Առաքելյանը։

Արդեն իսկ հայտնի 6 կարգախոսներից միայն 4-ում առկա է «Երևան» անունը։ Հայաստանի հանրապետական կուսակցությունը «Ավելի լավ Երևան» է խոստանում, ԲՀԿ-ն ունի երկու կարգախոս՝ «Սկսենք Երևանից» կամ «Փոխելու ենք», «Հայ ազգային կոնգրեսի կարգախոսը»՝ «Իշխանությունը քաղաքացուն»-ն է, ՀՅԴ կարգախոսն է «Երևան, փոխի՛ր Հայաստանը»։ «Ժառանգությունն» իր կարգախոսով բարևում է Երևանին՝ «Բարև, Երևան», իսկ Օրինաց երկիրը հավաստիացնում է, որ իրենք կարող են ավելին՝ «Մենք կարող ենք ավելին»։

ՀԳ. Մարտի 8-ին և ապրիլի 7-ին մայրաքաղաքում գեղեցիկ սեռի ներկայացուցիչներին ծաղիկներ բաժանելու բազմամյա փորձով հայտնի է երկու քաղաքական ուժ՝ ՀՀԿ-ն և ԲՀԿ-ն: Նման փորձը հաշվին առնելով՝ կարելի ենթադրել, որ այս անգամ բաժանված յուրաքանչյուր ծաղիկ իրենում մեկ քվեի հույս կպարունակի: