Հայ ճանաչվածները և նրանց մայրիկները (ֆոտո)

Դե, դե, սիրելի հայտնիներ, այս անգամ հերթը մայրերինն է. այժմ ոչ թե դուք կպատմեք, թե ինչ նվերներ եք մատուցել նրանց, այլ հենց ձեր մայրերը «կբացահայտեն» դրանք: Տեսնենք ձեզանից ովքե՞ր են մոռացել ժամանակին նվեր պատրաստել: Չէ՞ որ «Ե՞ս Yes!»-ից ոչինչ թաքցնել հնարավոր չէ:

Վերգինե Նահապետյան
Տիկին Վերգինեն բավականին հայտնի մայրիկ է: Նա մեր շոու-բիզնեսին միանգամից երեք երեխա է տվել :)՝ Սիլվա, Մանե և Էդգար Հակոբյաններին: Շոու-բիզնեսի վաստակավոր մայրը՝ տիկին Վերգինեն, մեզ պատմեց, թե Մայրության և գեղեցկության տոների կապակցությամբ ինչ են նվիրել երեխաները դեռ փոքր տարիքից: «Երեխաներս գրեթե միշտ միասին են նվերներ պատրաստում. փոքր տարիքում Մանես միշտ բանաստեղծություններ էր գրում, տղաս ձնծաղիկ էր հավաքում (հավանաբար Սիլվան էլ երգել է-հեղ :)): Շատ գեղեցիկ զարդերի հավաքածու ունեմ, որ երեխաներս են նվիրել. այն շատ եմ հավանում և միշտ օգտագործում եմ: Անցած տարի էլ՝ Սիլվաս մի մեծ անակնկալ մատուցեց ինձ. Կեսգիշերին մոտ տորթ նվիրեց՝ վրան գրված՝ «Մայրիկին»: Ընդհանրապես, այդ օրը երեխաներիցս միշտ զարդեր, ծաղիկներ, օծանելիք և տորթ եմ նվեր ստանում»,- esyes.am-ին պատմեց տկն Վերգինեն:

Նարինե Սարգսյան
«Կանանց միամսյակի կապակցությամբ նա ինձ միշտ ոսկեղեն կամ այլ զարդեր է նվիրել: Բայց քանի որ յոթ տարի Հայաստանում չի եղել, դրանք ժամանակ առ ժամանակ է նվիրել»,- ասաց մասնագիտությամբ բանասեր, ֆուտբոլիստ Էդգար Մանուչարյանի մայրը՝ տիկին Նարինեն: Նրա խոսքերով՝ այս տարի Էդգարը սվարովսկի քարերով թևնոց է նվիրել: «Միշտ տոների առավոտյան ցույց է տալիս, իբր չի հիշում, թե ինչ օր է: Հետո անակնկալ է մատուցում»,- ժպտալով պատմեց սիրված ֆուտբոլիստի մայրը: Սակայն պարզվում է, որ դա իրականության հետ որոշ կապ ունի. Ըստ տկն Նարինեի՝ Էդգարը շատ մոռացկոտ է, ինչի պատճառով էլ հեռախոսի մեջ միշտ նշում է կարևորագույն օրերն ու տոները: «Հիշում եմ, Էդգարը 12 տարեկան էր և իր առաջին գումարն էր վաստակել՝ ընդամենը 1000 դրամ: Այդ գումարով նա ձնծաղիկներ էր գնել իմ և դպրոցի ուսուցիչների համար»,- հավելեց Էդգարի մայրը՝ տիկին Նարինեն:

Օվսաննա Աբովյան
«Ընդհանրապես Լիլիթը ծաղիկներ և զարդեր է նվիրում: Նվերը մատուցելու յուրօրինակ ձև չի ընտրում, բայց այդ ամենը շատ հանդիսավոր է անում: Այս տարի միամսյակի կապակցությամբ Լիլիթն ինձ վերնաշապիկ նվիրեց,- ասաց երգչուհի Լիլիթ Հովհաննիսյանի ուսուցչուհի մայրը և շարունակեց,- ինձ համար ամենահիշվող նվերները եղել են մանկության տարիների ձեռնաշեն բացիկները, որոնցմիջի շնորհավորանքները թեկուզ սխալներով էին և մանուշակի կամ ձնծաղկի փոքրիկ փնջերը»: Հաշվի առնելով, որ Լիլիթը երգչուհի է, հետաքրքրվեցինք նաև, թե տիկին Օվսաննան «երաժշտական նվերներ» ստացե՞լ է, որին ի պատասխան տկն Օվսաննան հավելեց. «Նման դեպք «Երկու աստղի» ժամանակ է եղել. Լիլիթն ինձ ստիպեց այդ համերգին անպայման ներկա լինել: Այդ շրջանում տանը ոչ մի փորձ չէր անում և համերգի ժամանակ իր պատրաստած «Մայրիկ» երգն ինձ նվիրեց»:

Ալինա Սարգսյան
Հայաստանի շախմատի շեմպիոն Գաբրիել Սարգսյանը երկրից կամ քաղաքից հաճախ բացակայելու պատճառով չի կարողանում անձամբ շնորհավորել մասնագիտությամբ մանկավարժ տիկին Ալինային: «Գաբրիելս շատ քիչ է երկրում, քաղաքում լինում, դրա համար էլ միշտ զանգելով է շնորհավորում»,- մի քիչ տխրելով ասաց տկն Ալինան: Սակայն չնայած դրան՝ Գաբրիելը չի մոռանում այլ երկրներիցնվերներ բերել: «Երբ վերադառնում է, հիմնականում օծանելիք և շոկոլադ է բերում»,- նշեց շախմատիստի մայրը: Ըստ նրա՝ Գաբրիելը նվերները շատ համեստ է մատուցում. «Երբ քույրերի համար շոկոլադ է բերում, միշտ ասում է, այնտեղ դրված է, կարող ես վերցնել: Վերջերս էլ տիկին Ալինան որդուց նաև մի լավ արդուկ է նվեր ստացել. «Գաբրիելը նկատել էր, որ իմ արդուկն այնքան էլ լավ վիճակում չէ և իրհետ Գերմանիայից արդուկ էր բերել, որը շատ որակյալ է»:

Գայանե Մանուկյան
Ինգա և Անուշ Արշակյանների մայրը՝ մասնագիտությամբ մանկավարժ տիկին Գայանեն, ասաց, որ վերջին տարիներին աղջիկներից հիմնականում ներկայացման տոմսեր է նվեր ստանում, ինչպես նաև՝ արծաթյա զարդեր, հագուստ և ծաղիկներ: «Եթե երկրում են լինում, նվերը մատուցում են հենց մարտի 8-ին կամ ապրիլի 7-ին: Բայց ինձ համար միշտ էլ ամենալավ նվերը նրանց նոր գործերն են, որոնք նախապես լսում ենքողջ ընտանիքով. ինձ համար դա և՛ մարտի 8 է, և՛ ապրիլի 7»,- հպարտությամբ նշեց տկն Գայանեն: Իսկ արդյոք Անուշն ու Ինգան նվերը միասի՞ն են պատրաստում. մեր հարցին ի պատասխան՝ տկն Գայանեն նկատեց. «Այս տարի Ինգուլս արծաթյա զարդեր է նվիրել, իսկ Անուշը՝ հագուստ և Նարեկ Դուրյանի՝ «Մորաքույրը Փարիզից» ներկայացման տոմսեր»: Տիկին Գայանեն պատմեց նաև, որ Ինգան փոքր ժամանակ մի անգամ իրեն տուփով մորեխ է նվիրել: «Մի անկենդան, կարելի է ասել, սատկած մորեխ էր, չգիտեմ էլ որտեղից էր գտել :) Իսկ Անուշը մանուկ տարիքում միշտ բանաստեղծություններ էր գրում ու բացիկի տեսքով նվիրում»,-ժպիտով վերհիշեց Անուշի և Ինգայի մայրը:

{gallery}1173{/gallery}