Մեկնարկեց Վ. Փափազյանի անվան շեքսպիրյան միջազգային 9-րդ հանրապետական փառատոնը

ՀՀ մշակույթի նախարարության աջակցությամբ, Հայաստանի թատերական գործիչների միությունը՝ ս. թ. ապրիլի 6–13-ն անցկացնում է Վ. Փափազյանի անվան շեքսպիրյան միջազգային թատերական 9-րդ փառատոնը:

Վ. Փափազյանի անվան շեքսպիրյան միջազգային թատերական 9-րդ փառատոնը նվիրվում է փառատոնի համահիմնադիր, միջազգային մեծ ճանաչում ունեցող շեքսպիրագետ Անջեյ Ժուրովսկուն:

Փառատոնի շրջանակում կներկայացվի Անջեյ Ժուրովսկու մշակումով «Շեյլոկ» սցենարի հիման վրա՝ Վարշավայի թատերական ակադեմիայում ստեղծված համանուն լեհական ներկայացումը /գլխավոր դերակատար Պյոտոր Կոնդրատի/: Ռումինիայի Կրայովայի Շեքսպիրյան փառատոնի տնօրեն, միջազգային հեղինակություն վայելող թատերական գործիչ Էմիլ Բորոգինան փառատոնին կմասնակցի Վ. Շեքսպիրի մի քանի ստեղծագործությունների հիման վրա ստեղծված ներկայացումով: Ուլյանովսկի Ի. Գոնչարովի անվան դրամատիկական թատրոնը կներկայացնի «12-րդ գիշեր» կատակերգությունը /ՌԴ ժող. արտիստ, պետ. մրցանակի դափնեկիր Կոպիլով/, Փարիզի Ավանտի գեղարվեստամշակութային կենտրոնը՝ իտալա-ֆրանսիական «Օթելլո», իսկ Լեհաստանը՝ «Անջատի´ր, Էլա» ներկայցումներով /դեր.՝ Նատալյա Վիլկ, ըստ Շեքսպիրի պիեսների/:

Վ. Փափազյանի անվան շեքսպիրյան միջազգային 9-րդ հանրապետական փառատոնի բացումը տեղի է ունեցել այսօր՝ ապրիլի 6-ին, Գ. Սունդուկյանի անվան ազգային ակադեմիական թատրոնի «Ջոն Արքա» ներկայացումով և Երևանի պատանի հանդիսատեսի թատրոնի «Վենետիկի վաճառականը» մոնոներկայացումով:

Ս. թ. ապրիլի 6-ին՝ ժամը 13:00-ին, «Անի Պլազա» հյուրանոցում կայացել է Վ. Փափազյանի անվան շեքսպիրյան միջազգային թատերական 9-րդ փառատոնին նվիրված մամուլի ասուլիս: Ասուլիսին մասնակցում էին ՀՀ մշակույթի նախարարության աշխատակազմի ժամանակակից արվեստի վարչության գլխավոր մասնագետ Վ. Գրիգորյանը, փառատոնի նախագահ Հակոբ Ղազանչյանը, փառատոնի արտերկրի մասնակիցները: