Ապրիլի 7-ը Աստվածամոր ավետման տոնն է

Այսօր Հայ Առաքելական Եկեղեցին նշում է Ավետման տոնը,  որ Հայաստանյայց Առաքելական Սուրբ Եկեղեցին անշարժ կերպով նշում է ապրիլի 7-ին: Այս օրը, ըստ Ավետարանի, Գաբրիել հրեշտակապետը հայտնվեց Սուրբ կույս Մարիամին եւ ավետեց, որ նրանից ծնվելու է մարդկության փրկիչը` Հիսուս Քրիստոսը:

Անկախությունից հետո Ավետման տոնը մեկն է մեր այն ազգային-եկեղեցական տոներից, որ թոթափեց խորհրդային շրջանի արհեստական մոռացության փոշին և իր արժանի տեղը վերագրավեց մեր տոնացույցում: Տոնին առավել մեծ ժողովրդականություն հաղորոդող ազդակ դարձավ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի հայրապետական տնօրինությունը, համաձայն որի վերջին տարիներին Ավետման տոնի օրը մեր եկեղեցիներում կատարվում է մայրության բերկրանքին սպասող կանանց օրհնության հատուկ կարգ: Այս մեծագույն իրողության հիշատակն էլ հենց հավերժացրել է Եկեղեցին` հաստատելով Աստվածամոր Ավետման այս գեղեցիկ տոնը:

Կրկին հիշեցնենք, որ Հայաստանի Հանրապետության անկախության առաջին տարիներին ապրիլի 7-ն ընդգրկվեց ազգային տոնացույցում՝ հաշվի առնելով, որ արդեն 1700 տարի այս օրը Հայ առաքելական եկեղեցին նշում է որպես Սուրբ Ավետման տոն:

Երրորդ հանրապետության առաջին տարիներին Ավետման տոնը վերածվեց պետական տոնի, որպես Մայրության եւ գեղեցկության օր:

Ներկայիս Սփյուռքի նախարար Հրանուշ Հակոբյանի ջանքերով` օրենքով վերականգնեց մարտի 8-ի տոնը, որը դարձավ ոչ աշխատանքային օր: Միաժամանակ որպես տոն շարունակեց մնալ նաև ապրիլի 7-ը, սակայն դարձավ աշխատանքային:

2002թ. խորհրդարանը Ապրիլի 7-ը հանեց ոչ աշխատանքային օրերի ցանկից` վերադարձնելով խորհրդային Մարտի 8-ի կարգավիճակը:

Այդ օրից սկսած Հայաստանում ոչ պաշտոնապես ամեն տարի հայտարարվում է կանանց միամսյակ: