Հավաքականում խաղային անկում ենք ապրում. Հենրիկ Մխիթարյան

Ուկրաինայի առաջնության շրջանակներում «Դինամոյի» հետ խաղին ընդառաջ hotsport.ua կայքին տված հարցազրույցում դոնեցկցիների առաջատար Հենրիկ Մխիթարյանը նշել է.

«Պայքարին մեր թիմը լրջորեն է նախապատրաստվում,  ինչպես որ բոլոր խաղերին ենք պատրաստվում: Կարևոր նշանակություն չունի, թե ում հետ ենք մրցելու: Մեզ համար բոլոր խաղերը կարևոր են` անկախ մրցակցից, ինչպես նաև նշանակություն չունի մրցակցի դիրքը մրցաշարային աղյուսակում:

Խաղադաշտում ձգտելու ենք հաղթանակի, ինչպես որ միշտ: Ինձ չեն խանգարում այլ ակումբների կողմից իմ նկատմամբ հետաքրքրության մասին լուրերը: Պարզապես պետք է քիչ ուշադրություն դարձնել այդ խոսակցություններին: Ներկայումս «Շախտյորի» խաղացող եմ և ունեմ պայմանագիր այս ակումբի հետ: Դրանք ընդամենը զրույցներ են և ոչ մի կապ չունեն իրականության հետ: Իմ խնդիրը աշխատանքիս պատասխանատվությամբ մոտենալն է, ինչը և փորձում եմ անել: 

Իհարկե ցանկանում եմ շատ գոլեր խփել, բայց չպետք է մոռանալ, որ գլխավորը թիմային խաղն է և ակումբի հաջողությունները: Այդ պատճառով էլ իմ խփած գոլերի քանակը նշանակություն չունի, եթե «Շախտյորը» հաղթում է, դա ուրախացնում է երկրպագուներին: Հայաստանի հավաքականում խաղային անկում ենք զգում: Դա կապված է նրա հետ, որ վնասվածքներով և որակազրկումներով պայմանավորված` վաղուց չենք կարողանում խաղալ հիմնական կազմով: Այնուամենայնիվ, Հայաստանն այսօր բավականին լավ թիմ ունի, և մենք միշտ հավատում ենք, որ հաջողություն կունենանք, քանի որ թիմը շատ երիտասարդ է, և ճիշտ ժամանակն է առաջընթացի: