Կինը միշտ կին պետք է մնա. Սիպիլ

Ստորև ձեզ ենք ներկայացնում Ա. Մինասյանի «Սիպիլ» (կարդացե՛ք նաև` «Սիպիլը պահանջում էր, որ կանայք իրավահավասար լինեն տղամարդկանց»,  «Սիպիլի սալոնում լինում էր ժամանակի հայ մտավորականության ընտրանին») գրքից մեկ փոքրիկ հատված:

Սիպիլի հոդվածների մի մասը գրված է ֆեմինիզմի դիրքերից: Կնոջ մոտ եղած որոշ թուլությունների ու թերությունների համար նա մեղադրում է տղամարդկանց, որոնք անփույթ են դեպի կնոջ դաստիարակությունը, անտարբեր նրա վերափոխման նկատմամբ և չեն բողոքում այն զրպարտության դեմ, թե հայ կինը իդեալ չունի. «Թող փոխեն դաստիարակության կերպը, որ փոխվին ճաշակները, քանի որ իրենց ձեռքն է ամեն իշխանություն, դպրոցներ, վարչություններ, ուսուցչություն և մանավանդ գրականություն»:

Հայ կինն իր շուրջը` գրքերում, լրագրերում կարդում ու սովորում է սիրել երեք բան` հարստություն, գեղեցկություն և հաճույք: Եվ նա ամենի ձևով ու զոհողություններով – ընտանիքի, զավակի, ծնողքի – հասնում է այդ նպատակին: Իհարկե, սա էլ է իդեալ, բայց, Սիպիլի համոզմամբ, հարկավոր է նրա հակումներն ուրիշ ուղղությամբ զարգացնել:

«Մտքի դաստիարակությունը ամենեն մեծ թշնամին է բարոյականին», ուստի պետք է հոգ տանել կնոջ դաստիարակության մասին, և այն, ինչ չեն կարողացել անել այրերը, ձեռնարկում են իրականացնել ֆեմինիստները: Նրանք պահանջում են ամրացնել կնոջ հոգին կյանքի բոլոր փորձանքների դեմ և զորացնել «անոր բազուկները աշխարհի պայքարներուն համար: Կինը միշտ կին պիտի մնա, պայմանավ, որ իր սրտի բաղձանքներուն գործադրությունը ուրիշեն չպահանջե, այլ ինքը իր ձեռքով կատարե, որ իր բարոյականը կարենա պահպանել ոչ միայն ընտանիքի անվտանգ երդիքին տակ, այլև աշխարհի որ կողմը որ բախտը զինքը նետե, որ կարենա իր տունը կանգուն պահել, եթե այրը զայն քանդել ուզե. Վերջապես ինք մինակ բավե ինքզինքին և ընտանիքին, առանց կյանքի դժվարություններեն ազատելու համար իր սկզբունքեն կամ արժանապատվութենեն բան մը զոհելու»:

***

Գրավելու արվեստական միջոցները տկար ու վաղանցուկ միջոցներ են, - գրում է նա: Ֆիզիկական վայելչության հրապույրը ամենեն սուտն է, ամենեն խարդախն է, որովհետև անոր մեջ հաղթանակը միշտ նորինն է, ինչ որ ալ ըլլա հինին արժեքը: Եվ ընտանիքի մորը միշտ պետք չէ երբեք զիջանի մրցելու անոնց հետ, որոնց համար առևտրական հաջողություն մըն է հաճելի երևալը: Իր հոդվածներից մեկում Սիպիլը հատկապես ուշադրություն է հրավիրում այն հարցի վրա, թե ինչպիսի աղջիկների հետ պետք է ամուսնանալ: Նա կնոջ գեղեցկությունը լոկ արտաքինի մեջ չի տեսնում, այլ էության, բովանդակության, հոգու մեջ: Սիպիլը երիտասարդներին խորհուրդ է տալիս ընտրել խելացի, առողջ և զարգացած օրիորդների և գեղեցկությունը նախ այդ հատկանիշների մեջ տեսնել: Անշուշտ, հաճելի է, երբ դրանց միահյուսված է նաև ֆիզիկական գեղեցկությունը:

Նյութը`  Ք. Ա.- ի