Ավետ Բարսեղյան. Երբ կինը սխալ է, տղամարդը պետք է ներողություն խնդրի

Ապրիլի է 7-ը մայրության և գեղեցկության, կանանց գնահատելու և նրանց` մեր կյանքում ունեցած դերը կարևորելու ևս մեկ լավ առիթ է:

Օրվա թեմայի շուրջ այսօր մեր զրուցակիցը շատերի սիրելի, կանանց ու սիրո մասին երգերի հեղինակ, հաղորդավար Ավետ Բարսեղյանն է: Նա պատասխանել է ArmStar.am-ի բլից հարցերին:

-Ինչպե՞ս երջանկացնել կնոջը:

-Սիրել նրան, համբուրել ամեն առավոտ, անակնկալներ մատուցել, չնայած սերն ինքնին անակնկալ է: Պետք է նաև այնպես անել, որ հայ կինն իրեն միայնակ չզգա, կինն ուժեղ է, երբ միայնակ է, բայց այդ դեպքում երջանիկ չէ:

-Ի՞նչ բառերով տղամարդը կարող է արտահայտել սերը կնոջ հանդեպ:

-Այն բառերով, որ կուտակվել են նրա մեջ: Օրինակ՝ «Ես սիրում եմ քեզ»:

-Ի՞նչ պետք է անի տղամարդը, երբ կինը սխալ է:

-Ներողություն խնդրի: Ես դա կիրառում եմ վերջերս, շատ արդյունավետ է:

-Ի՞նչ սխալներ են հաճախ թույլ տալիս տղամարդիկ:

-Այն, որ հաճախ ներողություն չեն խնդրում կանանցից:

-Ի՞նչ հատկանիշներ կնոջը երբեք չպետք է բնորոշ լինեն:

-Տղամարդկանցից առավել և ավելին լինելու ցանկությունը:

-Ո՞ր տղամարդկանց են սիրում կանայք:

-Չգիտեմ, կանանց տեսակներն ավելի շատ են, քան տղամարդկանց: Եթե կինը պատկանում է «մայր» տեսակին, սիրում է այնպիսի տղամարդու, որին կկարողանա խնամել, կան նաև կանայք, ովքեր սիրում են իշխել: Ինձ թվում է՝ իրական օջախ պահող կանայք սիրում են տղամարդու որսորդ տեսակը:

-Տղամարդու ո՞ր քայլը կարող է հիասթափեցնել կնոջը:

-Անտղամարդկությունը:

-Չսիրած արտահայտություններ, որ թույլ են տալիս կանայք:

-Այն ամենը, ինչ հարիր չէ կնոջը. ըստ իս՝ կնոջը հարիր չեն հայհոյանքները և տղամարդակերպ լինելը:

-Ինչպե՞ս եք վերաբերվում այն հանգամանքին, որ այս մեկ ամսյակի կապակցությամբ տղամարդը նվեր չի մատուցում իր սիրելիին:

-Գուցե տղամարդու մոտ ֆինանսական ճգնաժամ է: Սակայն լավ է, որ նա անակնկալ անի, թեկուզ ձնծաղիկ գնի, որն արժե 200 դրամ: