Հովիկ Աբրահամյան. «Աերոֆլոտի» տոմսերն այս պահին կրկնակի թանկ են

«Հայ ազգային կոնգրես» խորհրդարանական խմբակցության պատգամավոր Նիկոլ Փաշինյանն այսօր Ազգային ժողովում հարց բարձրացրեց վերջերս մամուլում շրջանառվող այն լուրերի վերաբերյալ, որ «Արմավիա» ավիաընկերության չվերթների դադարեցումից մեկ օր անց՝ ապրիլի 2-ին՝ օրվա երկրորդ կեսից ռուսական «Աերոֆլոտ» ընկերությունը Հայաստանում 80 եվրոյով թանկացրել է ինքնաթիռի տոմսերը բոլոր ուղղություններով:

Փաշինյանի հարցին ի պատասխան՝ ՀՀ տնտեսական մրցակցության պաշտպանության հանձնաժողովի նախագահ Արտակ Շաբոյանը նշեց, որ ինքը ևս ունի նման տեղեկատվություն. «Ես նույնպես ունեմ որոշակի տեղեկատվություն, որ որոշ ավիաընկերություններում գնային փոփոխություններ են նկատվում, և այսօր առավոտյան հանձնարարել եմ, որ այս ուղղությամբ իրականացվեն աշխատաքներ»,-ասաց Շաբոյանը:

Շաբոյանի քայլը զարմացրեց Նիկոլ Փաշինյանին. «Ես, ճիշտն ասած, զարմացա, որ Դուք հանձնարարել եք ինչ-որ բան: Ինձ թվաց, թե ասուլիս պետք է արած լինեիք այսօր և հրավիրած լինեիք բոլոր շահագրգիռ կողմերին, որ եթե տոմսերի գների հետ կապված խնդիր կա, մոտենան Ձեզ»,-ասաց Փաշինյանը:

ԱԺ նախագահ Հովիկ Աբրահամյանը, միջամտելով, նշեց, որ ինքն ունի հստակ տեղեկատվություն, որ տոմսերը թանկացել են. «Ձեր լիազորությունների շրջանակներում ինչ-որ գործողություն իրականացրե՛ք: «Աերոֆլոտի» տոմսերն այս պահին կրկնակի թանկ են»,-ասաց Հովիկ Աբրահամյանը: