Անի Ավդալյան. «Սովորում եմ ամեն օր ու ամենքից»

Աղջկական ամենաշաբլոն, ամենադժվար և ամենանուրբ հարցն է. ինչպե՞ս գտնեմ իմ ոճը, որպեսզի լինեմ նորաձև, բայց չդառնամ շաբլոնության գերին և յուրօրինակ մնամ: Այս և այլ հարցերի պատասխանը լավագույնս գտել է վարսահարդար-ոճաբան Անի Ավդալյանը, ով խնդրի լուծումն ունի ոչ միայն իր, այլև հազարավոր այլ աղջիկների համար: Անիի առաջադրած լուծումներն օգնության են հասնում ոչ միայն շատ աղջիկների առօրյա ոճի, այլև հայտնիների բեմական կերպարների խնդիրը լուծելիս: Անի Ավդալյանն է ժամանակին կերտել Սիրուշոյի, Լիլիթ Հովհաննիսյանի, Նազենի Հովհաննիսյանի, Անահիտ Սիմոնյանի, Սոֆի Մխեյանի, Սյուզան Մարգարյանի, Աստղիկ Սաֆարյանի, Հռիփսիմե Հակոբյանի, Լուսինայի մի շարք կերպարներ: Ի դեպ, Սիրուշոն, Լուսինան, Անահիտ Սիմոնյանն ու շատ այլ հայտնիներ իրենց կյանքի ամենակարևոր օրը՝ հարսանիքին, հենց Անիին են վստահել իրենց վարսահարդարումը:

Վերաբացվել է Ani Avdalyan Image Centre-ի ընդլայնված կենտրոնը, որտեղ գործում են տղամարդկանց և կանանց առանձին մասնագիտացված, ինչպես նաև արտաքին տեսքն իդեալական դարձնելու համար նախատեսված այլ ծառայություններ մատուցող սրահները:
Վարսահարդար-ոճաբանը, սակայն, չի սահմանափակվել միայն աղջկական ոճեր ստեղծելով: Նա կերտել է նաև հայկական շոու բիզնեսի տղամարդկանց մի շարք կերպարներ՝ համագործակցելով Արամեի, Հայկոյի, Արման Հովհաննիսյանի, Ռազմիկ Ամյանի, Արմենչիկի, Մարտին Մկրտչյանի և այլոց հետ:

Լինելով շոու բիզնեսի հետնաբեմում՝ Անին պակաս աստղային համարում չունի: Այնպես որ, այս անգամ կքրքրենք նրա գործունեությունը :):

Թեև Անին մեծ հաջողությունների է հասել իր ոլորտում, իսկ «Ani Avdalyan Image Centre»-ը դարձել է շոու բիզնեսի իմիջ կենտրոնը, վարսահարդար-ոճաբանը չի դադարում սովորել: Անիի համար սովորելը կենսակերպ է դարձել: «Սովորում եմ ամեն օր ու ամենքից. բախվում եմ, համակերպվում, երբեմն վիճում, հաճախ հիանում ու զարմանում պարբերաբար համալրվող ու նորացվող գիտելիքներից, փոփոխվող արժեհամակարգերից ու սկզբունքներից: Ինձ համար սովորելը ապրելու բանաձևի պես մի բան է. ինչպես ասել է Ռենե Դեկարտը՝ եթե մտածում եմ, ուրեմն կամ: Իսկ եթե կամ, ուրեմն պետք է աշխատեմ, արարեմ ու սիրեմ, որ էլի սովորեմ»,- ասաց Անին, ով չկարողացավ առանձնացնել՝ իր ստեղծած կերպարներից որն է առավել տպավորվել իր մեջ, քանի որ յուրաքանչյուրին անհատական մոտեցում է ցուցաբերում: Հենց դրա շնորհիվ միևնույն կերպարը տարբեր մարդկանց դեպքում չի ունենում նույն տեսքն ու չի հաղորդում այն տպավորությունը, ինչ նախորդը՝ դառնալով յուրովի գեղեցիկ և տպավորիչ:

Անիի համար առանձնահատուկ են միջազգային տարբեր մրցույթների ժամանակ կերտած կերպարները, որոնք իրեն հնարավորություն են տվել առավել համարձակ և անկաշկանդ ստեղծագործելու և ստանալու այնպիսի կերպարներ, որոնք առօրյայում գուցե քչերի համար են կիրառելի, սակայն գեղեցիկի, ստեղծագործական մտքի ու մասնագիտական մոտեցման առումով շատ տպավորիչ են:

Վարսահարդարման մեջ արհեստի և արվեստի սահմանազատումը հաճախ մշուշոտ է: Այս առումով Անին իր պատկերացումներն ունի: «Իմ պատկերացմամբ՝ ցանկացած ասպարեզում էլ կարելի է գտնել եզրագծեր բնականի և արհեստականի, բնատուրի և ձեռքբերովի շնորհների միջև: Վարսահարդարությունը ևս բացառություն չէ. բավական է հետևել որոշ մասնագետների գործելաոճին, ձեռագրին ու իրենց աշխատանքի հանդեպ ունեցած ստեղծագործական մոտեցմանը, և հնարավոր կլինի պատկերացնել՝ նա որպես արհեստավո՞ր է ներգրավված ոլորտում, թե՞ արվեստ է փնտրում իր մասնագիտության մեջ: Արվեստագետ և ստեղծագործ մասնագետ լինելու համար, ըստ իս, անհրաժեշտ է ունենալ հարուստ ներաշխարհ և մտապատկերային մեծ պաշար: Ներշնչվելու համար առաջնային է նաև այն, որ կարողանաս գնահատել օտարի աշխատանքը, մրցակցի հաջողությունները, ընդհանրապես՝ մարդուն: Ավելի հստակ՝ արվեստագետը դադարում է լինել այդպիսին, երբ մարդու մեջ տեսնում է միայն հաճախորդի, ոչ թե բնորդի»,- ասաց Անին և հավելեց, որ այսօր շատերն են վարսահարդարությամբ զբաղվում, սակայն նրանցից քչերն են մրցակցային, քանի որ բոլորի միջև մրցակցություն լինել չի կարող. այն լինում է լավի և լավագույնի միջև: Ըստ Անիի՝ մեր երկրում կան լավ մասնագետներ, ովքեր ձգտում են լինել լավագույնը, ինչի համար ինքն ուրախ է: «Նրանց աշխատանքը ստիպում է պարբերաբար աշխատել սեփական մասնագիտական որակների վրա, որպեսզի միշտ մրցունակ, պահանջարկված ու սպասված լինես»,- շեշտեց Անին: Ի դեպ, նրա աշխատանքներն արհե՞ստ են, թե՞ արվեստ՝ կարող ես ինքդ որոշել՝ այցելելով aniavdalyan.com կամ aniavdalyan.am կայքերն ու ծանոթանալով նրա կերտած բոլոր կերպարներին:

Ոճաբանը նշեց, որ վարսահարդար Անին վարսահարդար-ոճաբան Անի Ավդալյան դարձավ ժողովրդի շնորհիվ. «Ինձ առաջ գնալու հնարավորություն տվեցին բոլոր այն մարդիկ, ովքեր հավատացին 16-ամյա երազկոտ աղջկան և իրենց գնահատականներով ուղղորդեցին ինձ՝ Անիին դարձնելով Անի Ավդալյան: Շնորհակալ եմ բոլորին, քանի որ նրանք, ովքեր գոնե կես խոսքով աջակցել են ինձ, խթանել են իմ ձգտումն ու նոր բարձունքներ գրավելը:

Ի դեպ, «Ani Avdalyan Image Centre»-ի վարած գնային քաղաքականության մասին. Անին նշեց, որ կենտրոնից կարող են օգտվել բացառապես բոլորը. «Մենք երբևէ որևէ խտրական մոտեցում չենք ցուցաբերում մեր այցելուների հանդեպ՝ անկախ նրանց սոցիալական դիրքից, քանի որ յուրաքանչյուր անհատ ունի իր պատկերացումները գեղեցիկի մասին, իր ճաշակն ու արժեհամակարգը: Չեմ կարծում, թե կլինի մեկը, ով չկարողանա մոտավոր պատկերացնել իր ցանկությունների և հնարավորությունների սահմանը: Ուստի յուրաքանչյուր այցելու իր ցանկություններն ու պահանջները հարմարեցնում է իր հնարավորությունների, միջավայրի ու զբաղեցրած դիրքի հետ: Մեր գործը ցանկացած ծառայություն որակյալ ու լավագույնս մատուցելն է՝ անկախ այցելուի ով լինելուց, նրան մատուցվող ծառայության տեսակից ու արժեքից»:

esyes.am