Ի՞նչ է սպասվում Սերժ Սարգսյանի երդմնակալությանը

Նախագահ Սերժ Սարգսյանի երդմնակալության արարողության նախապատրաստական աշխատանքները գրեթե ավարտվել են: Մարզահամերգային համալիրում վերջին «շտրիխներն» են արվում. արարողության համար անհրաժեշտ ամեն ինչ կազմակերպված է, հրավերներն ուղարկված են, հյուրերի մեծ մասն արդեն իսկ ժամանել է: Որքան էլ ասվում էր, թե արարողությունն աչքի չի ընկնելու առանձնապես բարձրաստիճան հյուրերի մասնակցությամբ, այնուամենայնիվ, դատելով հյուրերի ցանկից՝ այն պակաս ներկայացուցչական չէ:

Ճիշտ է, ո՛չ Վլադիմիր Պուտինը, ո՛չ էլ Բարաք Օբաման ներկա չեն լինի Սերժ Սարգսյանի երդմնակալությանը (նրանց բացակայությունը, սակայն, չարժե կապել Րաֆֆի Հովհաննիսյանի գործոնի հետ), սակայն փոխարենը կլինի ԼՂՀ նախագահ Բակո Սահակյանը: Նախապես հայտնի էր, որ Վրաստանի նախագահ Միխեիլ Սաակաշվիլին ևս ներկա է լինելու, սակայն վերջինս, ի դժբախտություն իրեն, «հաջողացրեց» Թուրքիայում ձեռքը կոտրել և այդպիսով զրկվել Սերժ Սարգսյանի երդմնակալությանը մասնակցելու հնարավորությունից:

Ռազմավարական գործընկեր Ռուսաստանի Դաշնությունը ներկայացված կլինի ՌԴ նախագահի աշխատակազմի ղեկավար Սերգեյ Իվանովի մակարդակով, ով ժամանակին՝ մինչև Դմիտրի Մեդվեդևի հայտնությունը, համարվում էր Վլադիմիր Պուտինի առավել հավանական փոխանորդը և ում հետ անձամբ Սերժ Սարգսյանը տարիների գործընկերության փորձ ունի, հատկապես երկուսի՝ պաշտպանության նախարար աշխատած տարիներին: Ռուսաստանից, իհարկե, այլ պատվիրակներ էլ կլինեն, ինչպես օրինակ՝ «Ռոսատոմ» պետական կորպորացիայի գլխավոր տնօրեն Սերգեյ Կիրիենկոն, ՌԴ ԱԳ նախարարի տեղակալ Գրիգորի Կարասինը և այլք:

Բարձրաստիճան հյուրերի թվում են Արգենտինայի փոխնախագահ, սենատի նախագահ Ամադո Բուդուն, Իրանի արտաքին գործերի նախարար Ալի Աքբար Սալեհին, Թուրքմենստանի փոխվարչապետ Սապարդուրդի Տոյլիևը, Ղազախստանի խորհրդարանի փոխնախագահ Ջակուպով Կաբիբուլա Կաբենովը, ՉԺՀ քաղաքացիական հարցերով փոխնախարար Գու Չժաոսին, Լիբանանի պետնախարար Մարվան Խերեդդին, ինչպես նաև խորհրդարանական ու կառավարական պատվիրակություններ Չեխիայից, Բելառուսից, Ուկրաինայից, Վրաստանից, Ռումինիայից, Կանադայից, Մոլդովայից, Միացյալ Թագավորությունից, Ճապոնիայից, Իսպանիայից, նույնիսկ Ալժիրից:

Միջազգային կազմակերպությունները ևս չեն շրջանցի ՀՀ նախագահի երդմնակալության արարողությունը. ՀԱՊԿ-ը ներկայացված կլինի գլխավոր քարտուղար Նիկոլայ Բորդյուժայի մակարդակով, ներկայացուցիչներ կլինեն նաև ՆԱՏՕ-ից և ՍԾՏՀ-ից: Հայաստանի Շախմատի ֆեդերացիայի նախագահ Սերժ Սարգսյանի նախագահական երդմնակալությանը ներկա գտնվելու համար Հայաստան է ժամանել նաև ՖԻԴԵ-ի նախագահ Կիրսան Իլյումժինովը:

Ներկա կլինեն նաև 70-ից ավելի դեսպաններ և դիվանագիտական այլ ներկայացուցիչներ:

Տեղական նշանակության հյուրերի թվում ամենաբարձրաստիճանը այս պահի դրությամբ ՀՀ երկրորդ նախագահ Ռոբերտ Քոչարյանն է: Առաջին նախագահ Լևոն Տեր-Պետրոսյանը, ինչպես և նրա հայացքները կիսող քաղաքական կուսակցություններն ու գործիչները չեն մասնակցի ՀՀ նախագահի երդմնակալությանը: Տեր-Պետրոսյանից, ըստ վերջին տեղեկությունների, որոշել է հետ չմնալ նաև ԲՀԿ կուսակցության առաջնորդ, ԲՀԿ խմբակցության նախագահ Գագիկ Ծառուկյանը: Վերջինս դարձյալ «վոյաժների» մեջ է և մամուլի խոսնակի փոխանցմամբ՝ ներկա չի գտնվի՝ հենց հանրապետությունում չլինելու պատճառով: Ի տարբերություն շեֆի՝ նախագահի երդմնակալությանը, սակայն, ԲՀԿ-ականների ներկայություն սպասվում է. ամենայն հավանականությամբ, հերթական անգամ կորդեգրվի «կուսակցությունից անկախ, անձնական դիրքորոշմամբ ներկա գտնվելու» թեզը:

Ազգային ժողովի վաղվա հատուկ նիստին պաշտոնապես չի մասնակցի նաև ՀՅԴ խմբակցությունը: Ըստ մեր տեղեկությունների՝ ձևավորվելիք կառավարությունում դաշնակցականներին, ի հեճուկս նրանց գործադրած համառ ջանքերի, որևէ «փայ» չի հասնի, ինչն էլ, ըստ էության, երևի թե ընկել է նման դիրքորոշման հիմքում: «Ժառանգություն» խմբակցությունը ևս չի լինի, քանի որ իր համար շատ ավելի լուրջ գործով է զբաղվելու. համընթաց Ազատության հրապարակում տեղի է ունենալու «Նոր Հայաստանի» երդմնակալությունը:

Ազգային ժողովի հատուկ նիստին բացի օրենսդիրներից ներկա կլինեն նաև գործադիրի անդամները, տեղական ինքնակառավարման մարմինների, մտավորականության, գիտության, գործարար շրջանակների, հասարակական կազմակերպությունների ներկայացուցիչներ, բազմաթիվ սփյուռքահայեր: Ինչպես հարկն է ներկայացված կլինի նաև հոգևոր դասը: Ընդհանուր թվով՝ շուրջ 2000 հոգի: Լրագրողները ևս ներկա կլինեն և կաշխատեն իրենց հատկացված սրահում, որտեղ կլինի նաև հյուրասիրություն:

Վաղը Սերժ Սարգսյանը դուրս կգա Բաղրամյան 26-ից, կուղևորվի Մարզահամերգային համալիր, կերդվի, որից հետո Հայաստանի Հանրապետության երրորդ նախագահը կթևակոխի իր պաշտոնավարման երկրորդ ժամկետը: Երդմնակալության այս արարողությունը համեմատության եզր անգամ չունի 2008-ի երդմնակալության հետ. մնում է հուսալ, որ Սերժ Սարգսյանի պաշտոնավարումն էլ անհամեմատելի կլինի նախորդ պաշտոնավարման հետ: Այս անգամ արդեն Սերժ Սարգսյանի ձեռքերը ոչ ոք չի «բռնել» և որևէ օբյեկտիվ խոչընդոտ «Ապահով Հայաստանի» կառուցման ճանապարհին, ըստ էության, չկա: Եթե իհարկե, նախագահական քարոզարշավի ընթացքում խոստումները տրվում էին կատարելու մտադրությամբ...

Լուսինե Կեսոյան