Մամիկ Մալխասյան. ««Սթրվեք» տանը ձեր կարմիր «մանիկյուրներով»»

Այս անգամ «Նորաձևության ոստիկանություն» էջ բերման ենթարկեցինք տոնական զգեստներով հայտնիներին, որոնք քննեցինք ինքնատիպ կոշիկների դիզայներ Մամիկ Մալխասյանի հետ. Վերջինս առանձին դեպքերում նաև հագուստի մոդելավորմամբ է զբաղվում: Նկարները նայելիս Մամիկը մի քանի անգամ ճշտեց՝ իրեն իսկապե՞ս «աստղերի» լուսանկարներ ենք ցույց տալիս: Դիզայները որոշ հայտնիների ճանաչում էր ոտքերից, ձեռքերից… Ամեն ինչ անում էր, որ հավատա՝ լուսանկարում ով է, թեև դա նրան ոչ միշտ էր հաջողվում:

Մամիկը դժգոհում էր, որ դժվար է քննել մարդու ոճը, երբ չես տեսնում նրա դեմքը: Նա փորձում էր մեղմ լինել, քանի որ, իր համոզմամբ, չի կարելի աղջկան խարազանել՝ հայը հային պետք է սիրի, բացի դրանից, ինչպես ինքն ասաց, սա այն դեպքն է, երբ ինքն իր հացին «վայիս» է լինում: Այնուամենայնիվ, նրա դեմքի արտահայտությունն ու ժեստերը մատնում էին հիասթափությունը: Երբեմն էլ երկու կարծիք էր արտահայտում միևնույն զգեստի մասին, նման դեպքերում արձանագրել ենք երկուսն էլ:

 

1. Նազոն է (նկատի ունի Նազենի Հովհաննիսյանին, ում, ի դեպ, ձեռքերից ճանաչեց -հեղ.): Շատ ազատ զգեստ է, ճիշտ է, որ մազերը թափված են: Շատ ճիշտ է հագնված, իրեն պետք չէ հագնվել սովորեցնել: Նրա վրա թերություն գտնելը մեղք կլինի: Նա այն մարդկանցից է, ով էնպիսի բաներ է հագնում, որ ամեն անգամ անձամբ ես զարմանում եմ: Եթե անգամ սա ոչ թե զգեստ լիներ, այլ ուսերից բլանդած ինչ-որ շոր, միևնույնն է, նա անթերի տեսք կունենար:

2. Լուիզան է: Շատ լավն է: Համադրությունը շատ ճիշտ է: Միայն այն, որ վզնոցն անտիկ է, ոչ թե ոսկի, արդեն ամեն ինչ ասում է. մազերի գույնին է համապատասխանեցրած:

3. Ուզում եմ ուղղակի լռել... Ինչի՞ մասին է: Ոչինչ չեմ կարող ասել: Ինձ համար անհասկանալի է:

4. Նորմալ է ամեն ինչ: Կոշիկները, զգեստը, ամեն ինչը համապատասխան է՝ ճիշտ համադրություն, սիրուն շորիկ: Ոչ հայկական է հագնված: Ես ուշադրություն կդարձնեի այսպես հագնված աղջկան: Ավելորդ ու պակաս բան չկա:

5. Անի Երանյանն է: Շատ կրեատիվ է: Երբ ինքը հագավ դա, շատ աչքի ընկնող էր: Թևնոցը շատ սիրուն է: Չգիտեմ «մանիկյուրը» ինչի հետ է համապատասխանեցրել, երևի ոտքերի, բայց շատ լավն է:

6. Ինչի՞ եք ինձ տանջում... Զգեստը լավն է, օձային է: Մատանիներն են ավելորդ: Կոշիկները, զգեստը շատ լավն են, գույնը շատ սիրուն է: Զգեստն այնքան էլ հետաքրքիր չէ, բայց նորմալ է: Ցանկացած՝ թե´ շատ էժան, թե´ թանկ խանութում կարելի է գտնել նման զգեստ: Ես գիտեմ, որ աստղը պետք է հագնի մի օրինակից զգեստ, որ մնացած միլիոնուկեսը «տպեն» նրա զգեստը, փորձեն մոտենալ դրան:

 

7. Էս էն պահն է, որ ես իմ հացին «վայիս» եմ լինում :) Հաճախորդ եմ կորցնում հենց հիմա :) Նորմալ հագնված է (հետաքրքրվեցի՝ արդյո՞ք այս կոշիկներն ինքն է կարել -հեղ): Ոչ, ես ո՞նց կարող եմ էդպիսի կոշիկ կարել, իր կոշիկներին նայեք. դա ոչ կոշիկ է, ոչ «բատինկա», դա «բոշիկ» է:

Փոքր չափսի կուրծք ունեցող մարդը իրավունք չունի այդ զգեստը հագնելու, դա ավելի է ֆիքսում փոքրությունը:

8. Ամեն ինչ շատ սիրուն է, նույնիսկ ճկույթին դրած մատանին շատ ճիշտ է: Միակ բանը՝ վարդագույն «մանիկյուրի» փոխարեն պետք է «ֆրենչ» լիներ:

9. Անթերի է ամեն ինչ: Սա աստղ է, ես տեսնում եմ աստղի. հագուստը, կոշիկները, վզնոցը, «կլաչը», նույնիսկ զուգագուլպայի գույնն անթերի է:

10. Չափազանց պրիմիտիվ, շա՜տ... Խոսելու ոչինչ չկա: Ես չգիտեմ՝ սա ի՞նչ է, ի՞նչ գույն է... Նկարահանման է գնացել ու այս գույնի... Ես կփոխեի ալիքը:

11. Իսկապե՞ս աստղերի նկարներ են: Տպավորություն է, որ ռեստորանում մեկի կնունքի նկարներն են: Կոշիկների քիթը զգեստի հետ չի «խոսում»: Զգեստն իրեն «բոյովացնում» է ու կլոր ծայրերով կոշիկի հետ անհամատեղելի է: Կա´մ պետք է կոշիկի բութ մատը բաց լիներ, կա´մ այլ քիթ ունենար: Աքսեսուարների առումով դատարկություն է, ոչինչ չկա, նույնիսկ «կոլյեն», որ կախել է, անտեղի է իր խուճուճ մազերի ու բացվածքի հետ:

12. Ես առաջին անգամ տեսա շիֆոնի և «սապոգների», այսինքն՝ համարյա «սապոգների» համադրություն: Փոխենք նկարը:

13....Գուցե իր համար ամեն ինչ տեղին է... Իր համար շատ բարդ կլիներ աքսեսուարի ընտրություն անել: Այդ կարգի ոճաբաններ էլ Հայաստանում չկան, որ կարողանային բացատրել՝ ինչ անել, որովհետև զգեստը վզով է իջնում, մեջքը բաց է, ինքը չէր կարողանա հասկանալ՝ ի՞նչ կախել հետը: Եթե զգեստի վրա մեծ «հրավառություն» է, կարող էր ապարանջան դնել:

 

14.Ուղղակի ուզում եմ հենց հիմա լացել: Մեղկ է էն ժողովուրդը, որ պետք է նայի ու փորձի այսպես հագնվել: Ինչ ասեմ. եթե ինչ-որ մեկը կարող է բան ասել, թող ասի:

15. Թող էդ մարդիկ իրենց տեղում «սթրվեն» էլի իրենց կարմիր «մանիկյուրներով»: Էս «մանիկյուրն» ինչի՞ հետ է համադրել... Հանգստացնող կանաչ գույնի հետ ինչի՞ է էս գույնի զուգագուլպա հագել: էս ի՞նչ կոշիկի քթեր են: Չեմ ուզում ոչ ոքի նեղացնել, փոխեք էլի...

16. Էս ի՞նչ զգեստ է, Սոնա, ո՞ւր է էստեղ համադրություն: Խնդրում եմ, այս նկարի տակ գրեք՝ Մամիկն ասում է՝ կներես, ինքը երևի կհասկանա:

17. Լիլիթ Հովհաննիսյանն է: Հրաշալի մարմին, հրաշալի զգեստ: Զգեստն այս անգամ շատ լավն է, ժամացույցը շատ ճիշտ է:

18. Մեր հերոսուհու ձեռքի պայուսակն արժե 25.000 եվրո: Այդ պայուսակը բռնող աղջիկը չի կարող հագնել «տիգրովի» զգեստ, ուրեմն դա պետք է լինի «Ռոբերտո Կավալիից»: Ես չեմ կարող ոչինչ ասել Սյուզի Մելիքյանին: Համոզված եմ, որ լրիվ օրիգինալ է: Մատանին օձ է, ճիշտ է:

19. Շատ մեծ քարերով ապարանջան է պահանջում: Նորմալ է, դեմքը փակ է, չես կարող բան ասել:

20. Ո՞վ է: Ես իր մասին ոչինչ չեմ ասի: Բաներ կան... Ես չեմ զարգացել այնքան, որ բան ասեմ:

Նյութը՝ es.yes.am-ի: